Tgi che vul trametter sia biestga sin in'alp da la vischnanca fusiunada da Cuira sto cumprovar ch'ils animals èn vaccinads encunter la malsogna da la lieunga blaua. Quai ha la regenza da Cuira decidì sin basa da la recumandaziun da la cumissiun d'alp.
Cun quella decisiun annunzia la citad da Cuira reglas pli severas ch'il chantun e la Confederaziun. Lez recumondan la vaccinaziun – ma senza obligatori.
Protesta avant dretgira superiura
Betg tut ils purs che portan lur biestga sin ina da las alps da Cuira èn d’accord cun l'obligatori da vaccinar. Perquai han otg purs fatg recurs tar la dretgira superiura encunter la decisiun dal cussegl da la citad.
Gia l'onn passà aveva la citad da Cuira relaschà in obligatori da vaccinar encunter la malsogna da la lieunga blaua per tut ils animals che van ad alp. E gia là na sajan betg tut ils purs stads d’accord cun questa decisiun.
Quest onn n'è restà nagut auter che far il pass davant dretgira.
In d'els è Mathias Caflisch da Maladers. L'onn passà hajan els rimnà suttascripziuns e tramess ina brev a la cumissiun d'alp per dir, ch'els na sajan betg d’accord cun l'obligatori. I n'haja dentant betg dà grondas reacziuns sin questa brev, di Mathias Caflisch. Quest onn haja la gruppa da purs tschertgà il discurs cun la cumissiun d'alp. Ma quai n'haja la cumissiun d'alp betg vulì.
Els avessan gugent discussiunà e reglà la chaussa cun tuts vi d'ina maisa, accentuescha Mathias Caflisch. Il pass davant dretgira saja stà l'ultima pussaivladad. Quel n'hajan els betg fatg gugent. I na saja betg empernaivel d'ir davant dretgira.
Els sajan dentant dal parairi ch'ils administraturs da las alps ed ils purs stuessan discutar e prender cuminaivlamain talas decisiuns. Sco pur sajan ins bler pli datiers als animals che la cumissiun d'alp e possia pia dir meglier tge che saja bun per ses animals.
Decidì è decidì
Il pur da Cuira, Hanueli Salis, na lascha betg valair ch'i n'haja betg dà la pussaivladad da discutar la tematica tuts ensemen. Ins haja gì in entir onn temp per far la discussiun, ma vegnida saja nagin'iniziativa dals purs che fetschian uss protesta da schliar il problem a moda e maniera proactiva.
Nus stuain discutar quai tuts ensemen fin che la discussiun è finida.
Cura ch'el haja udì ch'ina gruppa da purs giaja davant dretgira haja el mo pudì scurlar la testa. Questa via na chattia el betg buna.
En sasez dat el raschun, ch'in obligatori da vaccinar saja forsa in zic stravagà. Ma ussa saja quai decidì, e perquai sustegnia el per 100% questa decisiun.
En in punct perina
En in punct èn Mathias Caflisch e Hanueli Salis dentant perina: il maletg ch'i pudess dar dals purs da Cuira anoravers na saja betg bun. Ils paucs purs ch'i dettia anc a Cuira e las fracziuns stuessan esser unids. Ussa sto la dretgira superiura decider davart l'obligatori da vaccinar per las alps da Cuira. Cura che quai vegn ad esser il cas n'han ni Mathias Caflisch, ni il cusseglier da la citad responsabel, Simon Gredig, pudì dir.
Fin che la dretgira ha decidì, vala l'obligatori da vaccinar. Uschia ch'i na resta nagut auter als purs che vulan metter lur animals sin ina da las alps da Cuira che da laschar vaccinar lur animals.