Lungs dis da lavur, mancanza da persunal scolà, sfidas finanzialas, la lavur n'è betg cumpatibla cun avair ina famiglia – quai èn tut sfidas en la gastronomia. E quellas giogan ina rolla tar la decisiun, sch'insatgi vul manar vinavant in manaschi en questa branscha u betg.
Chattà nagina successiun
Ustaria Tödi a Breil: Nagina successiun, ma er anc nagina fin definitiva
Ses tat e sia tatta han bajegià si l'ustaria che giascha sin ina collina a Breil e ses geniturs han procurà per il bun num. Stefanie Degonda-Cavegn pudess simplamain cuntinuar cun il manaschi da famiglia. Blers onns è ella sa gidada en cuschina cun ses bab, durant che sia mamma era responsabla per il service.
Ma uschè simpel na saja quai betg, i dettia pliras raschuns che discurrian encunter, di la dunna da 37 onns. Ella è uss sezza mamma da dus uffants pitschens, stat cun sia famiglia a Cumpadials e maina là anc in bain puril ensemen cun ses um. Uschia è ella sa decidida da betg cuntinuar cun l'ustaria – ma quai cun in cor grev.
I n'è betg simpel da star tar quella decisiun. Igl è il manaschi da la famiglia, quai fiss la terza generaziun. Ins pudess mo seser en e far vinavant.
Sco la figlia n'èn er ils geniturs anc betg persvas da serrar l'ustaria dal tuttafatg e per adina. Uschia ch'els studegian gia puspè dad avrir las portas durant intginas stagiuns – en scadin cass dentant franc durant questa stad.
Hotel Post a Brail: Or da l'hotel datti abitaziuns
L'hotel a Brail en l'Engiadina aveva il tat d'Andri Juon bajegià si, ses geniturs han manà vinavant quel fin curt avant la pandemia. Lura han els mo pli avert quest per lavurers e taxistas. Durant dus onns ha il frar grond d'Andri Juon surpiglià il manaschi, ma tuttenina na vuleva er el betg pli. Ils quatter fragliuns Juon han alura decis da vender l'hotel ad in investur. Ussa vegn quel stgarpà giu per in bajetg cun pliras abitaziuns.
Cura che nus avain rumì l'hotel, èn ils patratgs schon stads tar ils temps vegls.
Quai saja stà emoziunal ed el saja sa dumandà pliras giadas, sch'el haja era propi tratg la dretga decisiun. Ma sch'Andri Juon guarda enavos, na crai el tuttina betg ch'el avess fatg auter. Igl haja la finala dà duas bunas raschuns, pertge ch'el n'haja betg vulì surpigliar l'hotel: L'um da 41 onns ha plaschair vi da sia lavur sco cussegliader e manader d'in team. Vitiers vegn che la stagiunalitad dal turissem en l'Engiadina saja simplamain in ristg memia grond.
La successiun è reglada
L'Ustareia Belavista a Stierva
Celina Sonder ha manà l'ustaria en il vitg da Stierva 50 onns fin che sia brit Pascale Wasescha e ses figl Ivan Sonder han surpiglià la batgetta. Malgrà ch'ella è gia pensiunada, sa gida ella anc adina en la Belavista. Ella ed er ils giasts han gì grond plaschair ch'i va vinavant cun il manaschi da famiglia.
Suenter ch'ella saja vegnida a star a Stierva ensemen cun ses um e ses uffants, saja stà cler per Pascale Wasescha ch'ella veglia surpigliar l'ustaria.
Per mai èsi stà ina decisiun dal cor da surpigliar l'ustaria.
Midadas n'haja ella betg fatg bleras en il mintgadi dal manaschi. Forsa mess in pau dapli paisa sin ils desserts. Il concept dals geniturs da ses um funcziunava, e midar insatge che funcziunia, fiss il pli tup ch'ins possia far. L'ustaria è renumada per ses capuns e quels veglia ella exnum far vinavant. Insatge haja ella dentant tuttina fatg auter che sia sira: Pascale Wasescha survegn dapli sustegn da persunas externas per ch'ella possia giudair ils uffants, uschè ditg che quels stettian anc a chasa.
Il Raselli Sporthotel a Le Prese
Per l'um da 37 onns, Marcello Raselli, èsi gia adina stà cler: Jau supigl in di l'hotel da mes bab. Per quai pass è el sa decidì definitivamain avant 10 onns. Dapi lura maina el il Raselli Sporthotel a Le Prese ensemen cun ses bab Bruno Raselli, ed ussa er anc cun sia dunna Elena. Els dus sajan gia la quarta generaziun Raselli che mainia l'hotel en il Puschlav.
Quai fa gea era plaschair a noss giasts da vesair ch'il manaschi vegn manà vinavant da la famiglia.
El è creschì si en il manaschi gastronomic e n'enconuscha nagut auter. Suenter ses emprendissadi da commerzi a Cuira, la scola d'hotellaria ed in pèr onns experientscha en differents lieus, è el turna en sia vallada. Per el n'haja quai dà naginas sfidas pli grondas, cura ch'el haja surpiglià l'hotel. Il pli impurtant saja stà e saja anc adina: las emploiadas ed ils emploiads. Bun persunal spezialisà saja grev da chattar. Ed els hajan il cletg da pudair lavurar cun intgins ed intginas gia dapi blers onns. Il persunal ed er ils giasts sentian, sch'insatgi lavuria cun plaschair e cun corp ed olma – e quai fetschia el.