La suprastanza aveva argumentà ch'i na saja betg l'incumbensa da la vischnanca da manar in’ustaria. Las votantas e votants han dentant claramain decidì che la vischnanca duai mantegnair l’ustaria dal vitg. Quai cun sanar il bajetg mo minimalmain.
3 Variantas: Engrondir, sanar u vender
La radunanza communala dal november passà aveva mussà: Las ed ils da Schluein vulan avair opziuns per pudair decider co vinavant cun l’ustaria dal vitg, La «Posta Veglia». La proposta da la suprastanza da far abitaziuns per indigens n’aveva betg persvadì dal tut las votantas e votants da Schluein.
La radunanza aveva alura decidì da cuntinuar cun la planisaziun. La suprastanza communala ha proponì mardi saira trais variantas:
- Construir ina chasa da generaziuns cun abitaziuns per glieud indigena, tge che muntass in engrondiment dal bajetg existent. Quai muntass custs da circa 5,2 milliuns francs.
- Sanar minimalmain il bajetg existent per utilisar quel sco fin ussa, tge che muntass custs da da sanaziun da var 500'000 francs, quintà sin ils proxims 10 onns.
- Vendita da l'entir bajetg per 900'000 francs. Quai senza ina part da la parcella.
La procedura da votar entras eliminaziun successiva e la dumonda da midar ina tractanda han procurà per in tschert schuschuri avant la votaziun. Il votum per anc ina giada reanimar la «Posta Veglia» e mo sanar minimal il bajetg è dentant stads uschè clers sco il sulegl. Las votantas e votants èn suenter viva discussiun e pliras votaziuns sa decis cun 61 encunter 3 vuschs per ina sanaziun minimala da l'ustaria. La vischnanca duai anc ina giada ir a la tschertga d'ustiers.
En in onn duai la radunanza communala anc ina giada decider
La vendita sco era la chasa da generaziuns n’èn anc betg dal tut giud maisa. En in onn duai la radunanza communala anc ina giada pudair decider co i duai ir vinavant cun la «Posta Veglia», ins pudess dir: far ina bilantscha provisorica. La suprastanza communala ha ussa da tschertgar novs ustiers.
Igl è status quo, almain enfin il proxim zercladur. Enfin alura guardain da chattar in nov affittader.
Per quella lavur survegn ella sustegn da la cumissiun «Posta Veglia» ch’è sa fatschentada da la rendita e dals tschains da l’ustaria.
La vischnanca aveva cumprà l’ustaria l’onn 2017 e sanà il bajetg l’onn sisur. Ils cust totals per quai avevan alura muntà a passa 1,3 milliuns francs. Tenor la vischnanca n'hajan ins betg pudì far remessas durant tut quest temp.