Cura ch'il scalin annunzia la fin da quest zercladur las vacanzas da stad en las scolas grischunas, munta quai per las 20 scolaras e scolars, sco era per las nov collavuraturas e collavuraturs da la Neue Tagesschule Chur da prender cumià per adina. Quella serra numnadamain – suenter var 30 onns – per adina sias portas, e quai detg surprendentamain.
Il motiv per questa decisiun saja simpel, declera Thomas Wäspe, il scolast e manader da la scola privata. Ins haja per il nov onn da scola memia paucas annunzias. 20 novas annunzias da scolaras e scolars avessi duvrà – dà haja naginas. Quai munta ch'ins avess gì in memia grond deficit. Perquai stoppia la scola privata serrar ord motivs finanzials, era sch'il plaschair da manar ina scola sco la NTC fiss vinavant qua, di il mainascola.
Cunquai serra ina da las unicas scolas privatas sin stgalim superiur en Grischun. Tge ch'è auter tar la NTC en cumparegliaziun cun autras scolas, declera Thomas Wäspe uschia: Per ina saja ins pli pitschen che las scolas da la citad e per l'autra saja ins fitg manaivel als scolars e scolaras, uschia ch'ins ils sappia sustegnair bain.
Nus avain era scolaras e scolars che n'èn betg uschè, en parantesas «confurm a las reglas» – nus pudain prender si els uschia co els èn e far pront els per la via che spetga.
Suenter l'annunzia che la Neue Tagesschule Chur serra, saja sa furmada ina gruppa da geniturs che veglia mantegnair la filosofia ed il partratg da la NTC cun fundar ina nova scola privata a Cuira. Però senza Thomas Wäspe. El di ch'el saja ussa stà 14 onns tar la scola privata NTC. Per l'ina saja quai in bun mument da far in auter pass e da cumenzar insatge nov. Ma el suttastritga che quai na saja betg il motiv pertge che la NTC serra. Da tschella vart pensia el ch'i saja ina buna schanza per la gruppa che vuless iniziar ina nova scola, da cumenzar da nov cun lur patratgs e lur ideas.
La dumonda per instradar ina nova scola superiura privata a Cuira è actualmain pendenta tar la regenza grischuna. Lezza sto numnadamain dar ina lubientscha per manar ina scola privata en il Grischun.
Tge di la citad da Cuira davart il fatg che la NTC serra?
Per la citad da Cuira saja la novitad che la NTC, la Neue Tagesschule Chur, serria las sias portas, vegnida nunspetgadamain. Ed i haja er consequenzas per els, di il cusseglier da la citad da Cuira, Patrik Degiacomi.
D'in maun saja la NTC ina buna e raschunaivla purschida da cumplettaziun sper la scola populara. E da l'auter maun saja la citad da Cuira affittadra da localitads per ina scolina tar la Neue Tagesschule Chur. Ed els hajan d'in mument sin l'auter survegnì la disditga per quellas localitads.
La scolina da la citad da Cuira sappia ins però fitg prubabel manar enavant en quest lieu. Ins haja, tant da la possessura dal bajetg sco er da la gruppa da geniturs che vuless avrir en las localitads da la NTC ina nova scola privata, «glisch verda».
Ins saja cuntent che la gruppa da geniturs s'engaschia per mantegnair a Cuira ina scola privata, di Patrik Degiacomi plinavant.
La NTC è in'impurtanta purschida supplementara. Nus essans uschiglio sceptics envers scolas privatas, ma en quest cas stuain nus propi dir che quai è savens ina buna soluziun per ils giuvenils e giuvenilas.
Sche i vegn a dar ina nova scola superiura privata a Cuira vegn a sa mussar il proxim temp. La gruppa da geniturs vegnia a prender posiziun cura che la decisiun da la regenza è avant maun. Nus tegnain Vus sin il current en chaussa.