Be 4% da las manischunzas e dals manischunzs da bus n'han insumma nagins problems da sanadad. Quai resulta d'ina retschertga che la Unisanté ha publitgà il 2022 sin incumbensa da trais sindicats (SEV, syndicom, VPOD).
Il motiv è tenor Barbara Keller, vicepresidenta dal sindicat dal persunal dals transports (SEV), la mancanza da persunal qualifitgà.
Ils mals èn la consequenza dad onns da cundiziuns da lavur pretensiusas.
Adina dapli manischunzas e manischunzs crodian ora u disdeschan lur plazzas, quai che haja consequenzas sin il persunal restant.
Ils manischunzs dattan raschun a la retschertga
In artitgel da Watson aveva da curt rapportà da manischunzs malcuntents en il chantun da Turitg. Cun tschintg manischunzs en il Grischun ha RTR discurrì. Mintgin conferma in u plirs puncts da la retschertga: problems fisics e psichics, squitsch da temp, strusch temp d'ir sin tualetta, dis da lavur – per part in suenter l'auter – cun blera preschientscha ed en relaziun paucas uras pajadas e, betg l'ultim, passagieras e passagiers pli critics ed agressivs.
Olaf Tschuschke, actualmain manischunz tar la Bus & Service AG, ch'è responsabla per ils bus da la citad da Cuira, è il sulet che na vul betg restar anonim.
Nagin sa senta responsabel per ils manischunzs da bus en Svizra. Il respect da patruns envers persunal è sa pegiurà.
Il manischunz tudestg conferma il squitsch da temp, ils lungs dis ed era las lungas serias da servetschs, schebain ch'el las fetschia voluntarmain. Sco el sajan blers da ses collegas manischunzs esters che basegnan ils daners.
Per Olaf Tschuschke è cler ch'insatge sto sa midar. El ha perquai disdì sia plazza e cumenza proximamain tar l'AutoDaPosta. Er il sindicat pretenda midaments concrets: servetschs da maximalmain 10 uras, temps da manischar da maximalmain 4 uras e pausas adattadas, nua ch'ins ha temp ed access d'ir sin tualetta e sa mover.
In tema permanent
La mancanza da persunal saja in tema permanent, hai num tar l’AutoDaPosta. Da passa 6'000 manischunzas e manischunzs giaja la mesadad entaifer ils proxims 10 onns en pensiun.
Il traffic public è sa sviluppà. I dat dapli viadis ed uraris pli lungs e sco consequenza dapli squitsch per il persunal.
Grazia a la scolaziun da midacarrieras na dettia actualmain naginas mancanzas.
Il malesser dal persunal enconuschian ins, hai num tar l’AutoDaPosta. Ins lavuria activamain ensemen cun partenaris socials vi da soluziuns, adattaziuns e purschidas per segirar er en il futur l’attractivitad da la professiun – saja quai cun giavischs da servetsch pli flexibels, models da lavur parziala u scolaziuns.
Era tar la Bus & Service AG (Dr Bus vu Chur) dettia in barat cun partenaris socials, di il manader da gestiun Ralf Kollegger. Per vegnir encunter al persunal dettia soluziuns tecnicas per optimar il plan da lavur e purschidas sco abunaments da sport e traffic cun reducziun da pretsch. Da persunas betg cuntentas n’haja ins nagina enconuschientscha, ins saja en stretg contact cun la cumissiun da persunal.
Entant che la critica è constructiva, empruvain nus da far tut il pussaivel per realisar ils giavischs dal persunal.
Manischunzs da bus da l'AutoDaPosta sco era da la Bus & Service AG han exprimì criticas considerablas envers RTR. Quant gronda che la part da persunas malcuntentas è, na sa lascha betg concluder. La professiun resta dentant sut squitsch. Novs resultats intermediars d'in studi a lunga vista che plirs sindicats, l'uniun da traffic public ed ils uffizis federals d'ambient, traffic, statistica e sanadad realiseschan ensemen, conferman quai.