Siglir tar il cuntegn

Header

cuntegn

Marina Jamnicki «Nus n'avain betg vulì ristgar in event da superspreader»

Al di da Nadal ha il chantun retratg als organisaturs da la Cuppa Spengler la lubientscha per l'occurenza gronda, pia sulettamain 30 uras avant che l'emprim puck fiss crudà sin il glatsch a Tavau. Sco la media chantunala Marina Jamnicki ha ditg envers RTR sajan cunzunt dus aspects stads decisivs.

A la fin n'haja betg dà in'autra opziun: tant l'erupziun da corona tar il Club da Hockey da Tavau, sco er la situaziun epidemiologica en la regiun Partenz/Tavau n'hajan betg lubì in'organisaziun dal turnier, uschia Jamnicki. Il Partenz è la regiun grischuna ch'è actualmain pertutgada il pli fitg da la pandemia da corona.

audio
Jamnicki: «Nus n'avain betg vulì ristgar in event da superspreader»
ord RTR Audio dals 26.12.2021. Bild: RTR
laschar ir. Durada: 17 Secundas.

Speranza per l'organisaziun da la Cuppa Spengler hajan ins gì enfin la fin, malgrà tut ils ristgs. Uss saja il cunfin però stà cuntanschì, uschia Jamnicki.

«I savess esser omicron»

Avrir la box Serrar la box

Ch'il HCD ha dad in di sin l'auter 17 cas positivs fetschia in zic surstar. Il club haja numnadamain in bun concept da protecziun. Per Jamnicki è il cas HCD in mussament quant contagiusa che la nova varianta dal virus saja - era sch'il chantun na possia anc betg dir definitiv sch'i sa tracta d'omicron – tut ils indizis mussian dentant en questa direcziun.

Situaziun sto vegnir valitada da nov

L'ultim temp è la situaziun epidemiologica en il chantun sa stabilisada, quai però sin in aut nivel. Il dumber d'infecziuns na saja betg sa reducì sco sperà, ha ditg Jamnicki envers RTR. En pli creschia il dumber d'infecziuns cun la varianta omicron, er tar vaccinads e guarids. Tar ils cas confermads dad omicron saja la mesadad vaccinada. Plinavant restia er la situaziun sin las staziuns intensivas critica. Entras il sport d'enviern creschia quest squitsch vinavant.

Tenor Jamnicki vegnia il chantun ord quest motiv a stuair decider, sch'i dovria novas mesiras. Il glindesdi saira è previs da s'entupar e discutar. En discussiun stettia tranter auter in'extensiun da l'obligatori da purtar mascrina e midadas tar il reglament da quarantina.

RTR novitads 17:00

Artitgels legids il pli savens

Scrollar a sanestra Scrollar a dretga