Siglir tar il cuntegn

Header

video
Co vesi ora a Tavau suenter l'annullaziun da la Cuppa Spengler?
Or da Telesguard dals 27.12.2021.
laschar ir. Durada: 3 minutas 18 Secundas.
cuntegn

Gronda dischillusiun a Tavau Far urden enstagl d'ina festa da hockey

Dus dis suenter l'annullaziun è la dischillusiun anc adina gronda tar responsabels e fans. Tge soluziuns ch'i dat finanzialmain e tge che capita cun ils tickets per las partidas da la Cuppa Spengler n'è actualmain betg cler. A Tavau vegn perquai fatg urden.

  • La 94avla ediziun da la Cuppa Spengler n'ha betg lieu il 2021.
  • Pervia da plirs cas da corona tar il HCD sco er la situaziun epidemiologica fragila sto il turnier vegnir annullà be in di avant il cumenzament.
  • L'entira equipa sco er tut ils funcziunaris sa chattan en quarantina.
  • Tge consequenzas finanzialas che l'annullaziun ha, n'ha il comité d'organisaziun betg anc pudì dir.
video
Marc Gianola davart l'annullaziun da la Cuppa Spengler
Or da Actualitad dals 25.12.2021.
laschar ir. Durada: 3 minutas 11 Secundas.

Pervi da plirs cas da corona tar il Club da Hockey da Tavau ha il chantun decis da tremetter l'entira equipa sco er ils funcziunaris en ina quarantina preventiva. Il HCD fa dapi emnas tests regulars tar l'equipa. Fin ils 24 da december sajan tut ils tests, cun excepziun dad in singul, stads negativs. Venderdi ha il HCD alura - malgrà certificat da 2G e pliras persunas cun vaccinaziuns da rinfrestgament - dumbrà 17 cas positivs.

Sut questas circumstanzas na possian ins betg pli lubir l'organisaziun dad in'occurrenza gronda, hai num davart dal chantun. Entras questa mesira veglia il chantun evitar in'eventuala erupziun d'omicron. Schebain i sa tracta tar las infecziuns tar il HCD propi da la nova varianta n'è dentant betg enconuschent.

Consequenzas finanzialas betg anc cleras

Tge donn finanzial che l'annullaziun dal tunier munta, na possian ins anc betg dir, uschia ha declerà Marc Gianola, il president da la Cuppa Spengler envers RTR. Ins stoppia uss respirar e lura far il quint. Il HCD saja dentant segir avisà sin agid dal maun public.

Entras la decisiun dal chantun croda la Cuppa Spengler sut la protecziun finanziala per occurrenzas publicas. Vul dir: il Chantun e la Confederaziun vegnan a mitigiar las consequenzas finanzialas per il club ed ils organisaturs. Quant grond ch'il sustegn finanzial vegn ad esser sto anc vegnir sclerì.

Consequenzas per la vischnanca

L'annullaziun ha era consequenzas per la hotellaria a Tavau. Blers hotels fissan stads plains ha ditg Reto Branschi, il directur da turissem da Tavau/Claustra envers il schurnal regiunal dad SRF. Era per la gastronomia munta quai perditas da fin 30%. Avant in'emna era gia vegnì annullà il WEF che procura normalmain per hotels plains mez schaner. Per tuttina anc mitigar in zic la situaziun vul Tavau ussa carmalar giasts cun acziuns specialas.

audio
Cuppa Spengler: L'atmosfera dus dis suenter l'annullaziun
ord Actualitad dals 27.12.2021.
laschar ir. Durada: 3 minutas 45 Secundas.

Virivaris gia avant

Gia avant il turnier avevan tant il Team Canada, sco er l'equipa dad Ambri-Piotta stuì annunziar ch'els na vegnian betg a prender part. Il motiv: la pandemia da corona. Be pauc suenter la retratga dad Ambri e Canada avevan ils organisaturs annunzià che Slovan Bratislava ed ina selecziun bernaisa vegnian a remplazzar las duas equipas, per uschia pudair realisar il turnier a moda usitada.

Dentant be 30 uras avant che l'emprim puck fiss crudà sin il glatsch è questa speranza a la fin. Suenter ch'il HCD ha dumbrà plirs cas da corona, n'han ils organisaturs gì nagin'autra letga che d'annullar er quest onn il turnier.

Proximas partidas dal HCD spustadas

Damai ch'il HCD quinta mumentan 22 cas da corona positivs, restan ils giugaders en quarantina. Consequentamain vegnan las trais proximas partidas dals hockeyans da Tavau spustadas. Quai ha l'associaziun da hockey svizra dà enconuschent. Pertutgads èn ils gieus a chasa cunter Biennna e Langnau, sco era quel ordaifer cunter Genevra-Servette. Cura che las partidas vegnan prendidas suenter è anc avert.

RTR novitads 11:00

Artitgels legids il pli savens