Il president da las Telefericas dal Grischun Martin Hug ha plaschair dal bun cumenzament da la stagiun d'enviern. El haja gì plaschair da vesair uschè blera glieud sin pista.
Tuttina relativescha Martin Hug las bunas cifras. Quest onn è stà il meglier cumenzament da la stagiun d'enviern dals ultims 10 onns. 1,14 milliuns giasts hajan las pendicularas transportà, 11,1% dapli che l'onn avant. La stagiun 2008/2009 haja dentant cumenzà cun 200'000 giasts dapli che quest onn.
Nus avain stuì gulivar quai che nus avain pers avant 10 onns.
Tuttina sa mussa el cuntent. Ina buna emprima part da la stagiun d'enviern saja ina bun indizi.
Trens plains, chombras plainas
Er per la Viafier Retica sajan ils ultims diesch dis stads fitg pretensius. Tranter Nadal e Bumaun hajan els duvrà bunamain mintga collavuratur e mintga collavuratura. Uschia il directur da la viafier Renato Fasciati.
Per nus èn quai gronds dis da cumbat.
Ils trens sajan uschè u uschia en viadi. Sch'ils vaguns èn plains saja quai dentant bler pli bel, manegia el.
In pli grond surrir ha il president da HotellerieSuisse Andreas Züllig. Tenor l'um cun agen hotel a Lai sajan ils dis tranter Nadal e Bumaun stads «perfetgs». Dentant: Fatg quint vegn pir la fin da la stagiun – e betg suenter ils emprims dis. Quai er, sch'ils dis tranter Nadal e Bumaun fan or tranter 20 e 25% da la svieuta da la stagiun.
RTR actualitad 17:00
