La medaglia «Schparz» vegn surdada dapi l'onn 1968 a persunas che s'engaschan per la citad da Cuira. Quest onn va la medaglia a Jacqueline «Jackie» Cavegn, ina dunna che s'ha fatg in num sco manadra da fatschenta e promotura da la cuminanza en la citad veglia da Cuira.
Ella è pir la sisavla dunna che survegn questa onur en l'istorgia da la medaglia.
«Pli sincera vendidra da Cuira»
Dapi passa 20 onns maina la dunna oriunda da Cumbel sia butia «Laki Mi» en la citad veglia da Cuira. Il num da la butia deriva dal englais «lucky me» – quai perquai ch'ella saja ina persuna che haja gì bler cletg en sia vita. Ella vala sco la «pli sincera vendidra da Cuira» e sia moda e maniera da manar la fatschenta è «Jackie» tras a tras.
Ina da sias maximas: Lavurar ensemen e betg mo per sasezza. Ed uschia è ella era stada in ferm motor per fundar l'uniun per l'entira citad veglia. Ella s'engascha fermamain per quella cuminanza – quai che vegn stimà fitg da ses collegas da fatschenta en la citad veglia.
Confettis betg en sia zona da confort
La medaglia «Schparz» vegn surdada uffizialmain ils 13 da favrer 2026 en il restaurant Marsöl a Cuira. La ceremonia da surdada vegn accumpagnada da musica e laudaturs sco il galarist Luciano Fasciati. Il di suenter, durant il grond cortegi da tschaiver, vegn Jackie a preschentar sia medaglia.
Per la dunna che di da sasezza ch'ella haja ina allergia da confetti – cunquai ch'ella saja tut auter ch'in fan da tschaiver – in pass ordvart sia zona da confort. Ma quai fetschia ella quest onn excepziunalmain per ses collegas da la citad veglia.