Per ils nars èsi uss la pli bella stagiun da l'onn. Questa fin d'emna è tschaiver a Cuira – datas che tutgan simplamain en l'agenda dal local da tradiziun Confetti. Igl è tut pront, ma: enstagl da decorar il local, piglia il manader giu ina part da las decoraziuns.
Questa decoraziun qua – ella è bain fatga da material resistenta al fieu, ma schon in zic pli veglia. Quella pigl jau ussa anc giu.
La bar è decorada extendidamain, in'emna haja il possessur Gil Nydegger pendì si differents objects e maletgs che han da far cun il film «Avatar». Per la decoraziun è la bar vegnida onurada da la societad da tschaiver.
Be paucs dis avant la festa è ina gronda part da las decoraziuns puspè en il satg da rument. La citad da Cuira controllescha numnadamain mintg'onn la decoraziun dals locals che sa participeschan a tschaiver.
Il facit da las controllas mussa, ch'i sajan quest onn vegnids controllads dapli locals: dapli locals sajan s'annunziads, ma er dapli hajan stuì prender mesiras. En tut èn sis locals s'annunziads – quai ch'i ston far sch'els installeschan decoraziun. Che las controllas sajan stadas pli severas, dementescha il cusseglier da citad responsabel Simon Gredig.
La gronda part dals manaschis controllads s'ha annunziada. Nua che las specificaziuns dal material era cumprovadamain segir, avain nus pudì schliar quai uschia. Per part avain nus fatg emprovas da fieu. Mo paucas decoraziuns han stuì vegnir allontanadas.
Anticipà controllas periodicas
Independent da tschaiver sajan dentant las controllas periodicas per la protecziun d'incendis per part vegnidas fatgas pli baud che atgnamain prescrit, raschun per quai saja l'incendi catastrofal a Crans-Montana. Quel haja augmentà l'attenziun e l'interess da las ustieras e dals ustiers en puncto segirezza.
La citad n'haja dentant tenor atgnas indicaziuns betg adattà las mesiras per la controlla. Tar questas controllas vai cunzunt per las sortidas d'urgenza, pia portas e fanestras. Plinavant vai er per la dumonda, quantas persunas che dastgan insumma esser en il local.
Ils puncts che vegnan controllads muntan per blers locals però er restricziuns. Laschar serrà perquai ch'i na renda betg cun dumber da persunas reducì, laschar davent decoraziuns dal tuttafatg u adattaziuns architectonicas che pon chaschunar custs auts – tut temas che ils locals da Cuira ston ponderar. La citad ha chapientscha, la consequenza na saja però betg exagerada.
A Gil Nydegger, il possessur da la bar Confetti, dettian las controllas ina tscherta segirezza. Dentant paran las controllas da quest onn ad el pli strictas – sper prender giu decoraziun, ha el er stuì adattar las portas, per ch'ellas sajan adattadas a las prescripziuns en connex cun las sortidas d'urgenza.
Per fortuna avevan nus anc temp da realisar las adattaziuns avant tschaiver.
En la bar Confetti stat als amaturs da tschaiver pia nagut pli enta pes per festivar tut tenor mesiras da segirezza la 5avla stagiun.
Auter vesa quai ora tar il local Marsöl, in local nua ch'igl ha ils ultims onns dà festas grondas cun fin a 800 persunas. Sco il manader ha ditg envers RTR, na saja dentant actualmain betg pussibel per els d'ademplir las mesiras ch'èn dumandadas quest onn. Enstagl da 800 dastgassan be pli 300 persunas entrar. Ultra da quai avessan els er stuì adattar per part l'infrastructura, ed uschia na rendessan ils dis da tschaiver betg per els, pia restan las portas dal Marsöl durant quest tschaiver serradas.