Gievgia grassa - Domat fa barlot

Las vias da Domat èn plainas la bun'ura baud. Tschintg guggas e duas gruppas da tamburs procuran per canera e musica e cloman ord la sien anc ils ultims che dorman a Domat. In che sa legra mintg'onn fitg sin il temp da bagoras è Ramun Fetz da la gugga Moorschlümpf. Els sa preparian l'entir onn e la gievgia grassa cun ses «Urknall» ed il til cun giuven e vegl sajan ils puncts culminants. La cumpagnia e co la glieud sa legria dal barlot saja quai che fetschia el ventiraivel.

«Aibäcks»: vent frestg en ina tradiziun veglia

Domat ha ina lunga tradiziun da tschaiver. Dapi blers onns van musicas da gugga e tamburs tras il vitg. Ils da Domat sa legran mintg’onn da las Bagordas.

Dapi il 2024 datti ina nova gugga - «ils Aibäcks». La gugga è vegnida fundada ils 12 d’avrigl 2024. Ella vul purtar in vent frestg en il tschaiver da Domat. RTR ha accumpagnà la gruppa durant il culp da partenza da las Bagordas da Domat.L’idea davostiers saja stada da crear insatge nov e pli modern per puspè motivar ils giuvens per il tschaiver e per il sunar en ina gruppa. E quai è gartegià: gia suenter curt temp ha la gugga gia 51 commembras e commembers.

Preparaziun per il culp da partenza

Avant la partenza dal tschaiver 2026 sa scuntran ils «Aibäcks» en ina garascha a l'ur da Domat. Là sa preparan els ed ellas per lur cumparsa. Intgins stattan davant ils spievels e malegian lur fatschas cun quadrets mellens, auters sa metten en ils costums nairs cun ils detaigls d'aur. L’atmosfera è lucca, i vegn ris e fatg sgnoccas.

Las commembras ed ils commembers dals «Aibäcks» fan part a la gugga ord differnts motivs: tschertas persunas sajan vegnidas dumandadas, sch’ellas veglian sa participar. Autras hajan tschertgà ina nova sfida.

Intgins dals commembers na savevian avant gnanc sunar in instrument u leger notas – quai hajan ellas alura tut emprendì tar ils «Aibäcks» . I na giaja numnadamain betg per la perfecziun, bler pli important saja il plascher da sunar en ina gugga.

Dapli che mo ina gugga che fa ensemen musica

Natiralmain giogha la musica ina rolla impurtanta. Ils «Aibäcks» han in repertori vast: els sunan tocs dals geners da pop, hiphop sco era dal rap.

Ma per las commembras ed ils commembers saja la gugga bler dapli che mo far ensemen musica. Anc pli bel saja l'esser ensemen, rier ensemen, sautar ensemen, far festa ensemen e simplamain giudair la cumpagnia.