Actualmain survegnan ils abunents e las abunentas da La Quotidiana, La Pagina da Surmeir e La Posta Ladina las gasettas per posta u online. Intgins texts da la FMR vegnan era publitgads sin la pagina d'internet da RTR. Entant in lieu nua che mintgin e mintgina po leger gratuitamain ils artitgels da la FMR na datti betg, malgrà che la Fundaziun Medias Rumantschas vegn sustegnida dal maun public. Ed il motiv principal persuenter sajan las gasettas, di il schefredactur David Truttmann.
Pertge duai jau abunar la gasetta regiunala, locala sch'i ha tut online?
Pia pli gugent desister dal fatg che mintgin e mintgina po leger gratuitamain ils artitgels scrits da la FMR, per pudair proteger las gasettas che han uschè u uschia ina digren d'abunents ed abunentas?
L'intent da la FMR è quel da promover las medias rumantschas, vul era dir da promover mediums ch'èn veramain fitg fitg derasads sco las gasettas.
Tuttina accentuescha David Truttmann che mintga partenari, vul dir per exempel la Somedia che distribuescha La Quotidiana u Gammeter Media che fa quai cun la Posta Ladina, sco era RTR u l'Uniun rumantscha da Surmeir, pudess gia ussa far public ils texts da la FMR. Enfin ussa sajan però tuts stads da l'opiniun da betg far quai.
Guardà enavant vegni dentant a dar ina midada – almain singuls texts duain esser accessibels online per tuts e tuttas. L'idea è da metter online mintga di trais fin quatter artitgels da las redacturas e dals redacturs da la FMR per derasar lur cuntegns – e quai a partir da proxima stad.
Reacziuns dals partenaris
Quai na plascha dentant betg propi als partenaris da la FMR. Cun publitgar online ils cuntegns pericliteschian ins il mund da medias rumantsch, di per exempel Silvio Lebrument, il president dal cussegl d'administraziun da la Somedia. Quella è responsabla per la stampa da La Quotidiana che cuntegn bunamain mo cuntegns da la FMR.
La Posta Ladina/Engadiner Post che cumpara trais giadas l'emna è bilingua. La part rumantscha consista per 80% da texts dals redacturs e da las redacturas da la FMR. E sche quels cuntegns fissan da nov accessibels gratuitamain per tuts, avess quai cunzunt in effect sin lezza part da la gasetta. Che la gasetta sco tala fiss periclitada da svanir dal tuttafatg, dubita il viceschefredactur Nicolo Bass:
Periclitada fiss forsa la part rumantscha en La Posta Ladina, quella na vegniss forsa betg pli uschè regularmain sco quai ch'ella vegn fin ussa.
Betg cler fiss era co ch'i giess vinavant cun la gasetta emnila La Pagina da Surmeir. Cun 1000 ediziuns per emna è ella ina da las pitschnas gasettas grischunas. Sia editura è l'Uniun rumantscha da Surmeir, ils artitgels che tractan savens temas regiunals vegnan però surpigliads da la redacziun da la FMR u da RTR. Era sch'il president da l'uniun Gian Sonder ha gia stuì s'occupar cun il patratg da la digitalisaziun, preferescha el da leger las novitads sin palpiri:
Quai è stà ina cundiziun cura ch'ins ha creà la FMR, ch'i dettia questa purschida, quest pool da novitads che la FMR metta a disposiziun. El na duess però betg esser accessibel a tuts, perquai che uschiglio perdain nus sco editurs natiralmain nossa incumbensa.
En general na paran ils partenaris betg anc d'esser pronts per quest pass. Silvio Lebrument da la Somedia manegia ch'il temp na saja betg anc madir:
Jau pens ch’ins duess laschar là in zic temp, perquai ch’il mund analog sa mida main spert che quai ch’ins pensa.
Nua e co che la FMR vuless publitgar intgins da ses artitgels per tuts n'è anc betg cler dal tuttafatg. Era anc betg cler è sche tut ils artitgels vegnan in bel di ad esser accessibels a l'entira populaziun, sco era tge influenza che quest pass avess lura per las gasettas e lur chasas edituras.