Siglir tar il cuntegn

Header

video
Reacziuns da la Somedia sin ils plans per il Radio Alpin
Or da Telesguard dals 25.05.2023.
laschar ir. Durada: 3 minutas 24 Secundas.
cuntegn

Medias Nagina tema per la concessiun tar la Somedia

L'interprendider da medias Roger Schawinksi vul realisar ensemen cun ina gruppa in emettur da radio en Svizra Orientala. Per il «Radio Alpin» haja la gruppa entant inoltrà la dumonda per ina concessiun a l'Uffizi federal da communicaziun Bakom. La Somedia na fa betg gronds quitads per lur radio.

Tar la Somedia na par'ins betg d'esser fitg surstà ch'i pudess dar concurrenza. Il mainafatschenta «medias» da la Somedia, Silvio Lebrument di ch'els hajan quintà ch'i dettia concurrenza per la concessiun. El possia chapir ch'ina concessiun cun taxas saja lucrativa per in emettur da radio turitgais.

Somedia è optimistica

Silvio Lebrument di ch'el saja optimistic che la decisiun per la concessiun crodia er quella giada a favur da la Somedia. Els hajan quintà cun concurrenza ed er resguardà quai tar lur dumonda. Schebain ch'el n'enconuschia betg ils arguments da la cunterpartida haja la Somedia la megliera dumonda che la concurrenza. El na vesia nagina raschun pertge ch'il Bakom na duess betg dar la concessiun a la Somedia.

audio
Tge di la Somedia da la nova emprova da la concurrenza?
ord Actualitad dals 25.05.2023. Maletg: Keystone
laschar ir. Durada: 3 minutas 5 Secundas.

L'argument ch'els hajan il monopol da radio en il Grischun na lascha Silvio Lebrument betg valair. En il temp dad oz cun massa emetturs da radio en la rait na possian ins betg discurrer dad in monopol. La perdita da la concessiun fiss la fin per «Radio Südostschweiz» en sia furma actuala, cun quai che las taxas sajan eminent impurtantas. Uss sto l'Uffizi federal da communicaziun Bakom giuditgar tut las dumondas inoltradas per ina concessiun. La Somedia vegnia natiralmain a s'occupar cun quai. Silvio Lebrument para d'esser persvas ch'ins vegnia er en il futur ad udir «Radio Südostschweiz» en las valladas grischunas.

«Radio Alpin» sco concurrenza per la Somedia

En la bartga da quest project ensemen cun Roger Schawinski è Stefan Bühler, l'ex-schefredactur da la «Bündner Zeitung», sco Radio Alpin ha communitgà. Ils dus iniziants renvieschan qua er al «monopol da medias factic» da la gruppa Südostschweiz en la regiun. La gruppa da medias da Hanspeter Lebrument consista da TV Südostschweiz, Radio Südostschweiz sco er da las gasettas Südostschweiz e Bündner Tagblatt.

Concessiuns da radio e televisiun

Avrir la box Serrar la box

Per ina regiun d'emetter datti mintgamai ina concessiun da radio e televisiun. Questas concessiuns surdat l'Uffizi federal da communicaziun Bakom. Mintg'onn reparta l'uffizi 86 milliuns sco daners da concessiuns – 6% dals daners da la Serafe che na vegnan betg surdads a la SSR mabain als emetturs privats.

La proxima concessiun vegn surdada per ils onns 2025 fin 2035. A partir da lura datti era ina nova clav da repartiziun per ils daners. Per la Somedia avessi lura uschè u uschia dà radund 800'000 francs pli pauc.

«Cun ina nova concessiun da radio pudess ella [la gruppa Südostschweiz] anc engrondir sia posiziun dominanta», scrivan Schawinski e Bühler en la communicaziun. Tenor la lescha duess dentant la purschida che represchenta il meglier la varietad d'opiniuns e da purschidas survegnir la concessiun. Schawinski e Bühler èn persvas ch'els pon porscher ina contribuziun vasta per la diversitad en la regiun da la Svizra Orientala. Il program da 24 uras dal Radio Alpin duai sa focussar sin infurmaziun.

audio
Roger Schawinski e Stefan Bühler vulan realisar nov radio per Svizra Sidorientala
ord Actualitad dals 24.05.2023. Maletg: Keystone
laschar ir. Durada: 3 minutas 19 Secundas.

Segunda emprova da Schawinski

I n'è betg l'emprima giada che Roger Schawinski vul realisar in emettur da radio en questa regiun. Gia l'entschatta dals onns 2010 ha el cumbattì per ina concessiun en la regiun d'emetter dal Radio Südostschweiz ch'aveva lura anc num Radio Grischa.

Il 2013 ha il Bakom dentant surdà definitivamain la concessiun a Radio Grischa. Quai suenter in cumbat intensiv da plirs onns. Il Bakom era vegnì a la conclusiun che la gruppa da medias Südostschweiz domineschia bain il martgà, ella na maldovria dentant betg questa posiziun.

Schawinski era lura anc ì fin davant il Tribunal administrativ federal. Ma er in recurs fin davant il Tribunal europeic dals dretgs umans a Strasbourg n'ha la finala betg purtà la concessiun giavischada.

RTR novitads 11:00

Artitgels legids il pli savens