L'Uffizi federal da communicaziun Bakom reparta mintg'onn 86 milliuns francs sco daners da concessiun. Quai èn ils 6% dals daners da la Serafe che na van betg a la SRG, mabain als emetturs privats.
Il 2025 sa mida la clav da repartiziun da quels daners. Cun questa nova clav datti grondas midadas per la Somedia. Ella survegn uschia en tut 800'000 francs damain per onn. Ensasez fiss la contribuziun perfin 1/4 pli bass, pia 2 milliuns pli pauc. Perquai ch'i vala dentant ina clausula che la contribuziun na dastga betg sa reducir per dapli che 10%, èsi be 800'000 francs damain.
Far tut il pussibel per tegnair il persunal
Latiers vegnan las concessiuns scrittas ora da nov e las interpresas da radio e televisiun ston enfin la fin d'avrigl s'annunziar da nov per survegnir ellas. Per regiun d'emetter datti mintgamai ina concessiun da radio e televisiun.
La Somedia sto pia uss vegnir a frida cun pli pauc. Tenor il directur Silvio Lebrument n'èsi anc betg cler, co e nua ch'els emprovan da spargnar. Ins emprovia dentant da betg restrenscher u midar il program e da far tut il pussibel che quai n'ha betg in'influenza sin il persunal. La nova clav da repartiziun da las concessiuns vala davent dal 2025 enfin il 2035.
