Las stentas per augmentar il dumber da medis e medias da chasa en il Grischun portan fritg. Quest facit ha il chantun tratg oz.
Tenor Dr. med. Sergio Compagnoni, president dals medis da chasa dal Grischun, van ils proxims onns bunamain la mesadad dals medis e las medias da chasa dal chantun Grischun en pensiun. En l'avegnir vegnia cunzunt a dar in problem en las regiuns periferias dal chantun.
Dus programs da furmaziun
Gia l'onn 2009 aveva il chantun lantschà il program «Capricorn» per prender mesiras cunter la situaziun da mancanza da medis e medias da chasa. Quel ha sco finamira da crear plazzas da furmaziun en praticas per persunas che vulan daventar medi u media da chasa.
Dapi 2014 èsi era pussaivel d’absolver la furmaziun en l'ospital chantunal dal Grischun nua che ils participants e las participantas survegnan invista en differents champs spezialisads.
Ils dus programs èn vegnì fusiunads il 2022. La paglia dals participants e las participantas vegn surpiglià per 75% dal chantun. Questa purschida custa al chantun il 2024 1,6 milliuns francs. La responsabladad per ils programs ha l'Ospital chantunal surpiglià cun la fusiun.
La purschida e la fusiun dals programs portian fritg. Dapi il 2022 hajan ins pudì augmentar las plazzas en ils programs ed il dumber da participantas e participants saja creschì per var 50%. Tenor il manader da las purschidas Dr. med. Patrick Scheiwiler saja impurtant dad era porscher vinavant plazzas da furmaziun entaifer ils programs. Ina sfida restia vinavant dentant era da chattar persunas che vulan daventar medi u media da chasa. En dus onns duajan tut las plazzas che vegnan purschidas en il program esser plazzadas.
Dar dumogn a la situaziun
Ord vista dal chantun e da l'associaziun dals medis grischuns saja la purschida da gronda impurtanza per era pudair garantir en il futur avunda medis u medias da chasa. Cunquai che las pazientas ed ils pazients vegnan adina pli vegls e las malsognas pli cumplexas dettia adina dapli lavur per medis e medias da chasa. Latiers dettia in svilup tar praticas communablas e blers na sajan betg pli pronts da lavurar cun temp cumplain. Uschia dovri en il futur anc dapli medis e medias da chasa. Per dar dumogn a la situaziun ha l'associaziun svizra da medis da chasa lantschà ina petiziun sin nivel politic cun l'intent da stgaffir anc dapli plazzas per la furmaziun e sustegnair anc pli fitg purschidas sco ils programs en il chantun grischun.
