Artitgel 1 da la lescha da meglieraziun dal chantun Grischun di: «Meglieraziuns èn mesiras, ovras e construcziuns agriculas autas e bassas che han l'intent da mantegnair u d'augmentar la productivitad dal terren, da facilitar sia cultivaziun u d'al proteger cunter devastaziuns u destrucziuns chaschunadas d'eveniments da la natira.» Quai è dentant mo in artitgel da la lescha che cumpiglia en tut 56 artitgels.
Daniel Buschauer, il manader da l'Uffizi d'agricultura e geoinfurmaziun è fitg cuntent cun la situaziun en il Grischun. «Ina megliuraziun sto vegnir da sut si» punctuescha Buschauer ed uschia vegn il chantun mai a far squitsch sin ils purs ni sin las vischnancas che n'han anc fatg nagina megliuraziun. Impurtant saja dad esser conscient ch'ina megliuraziun saja in project da generaziuns.
![Daniel Buschauer Daniel Buschauer](https://www.rtr.ch/static/cms/images/960w/52570c.jpg)
Pli pauc menaschis – medem blera surfatscha da cultivaziun
Ils davos 30 onns han la mesadad dals menaschis agricols chalà. Eran quai ils 1992 anc 3800 menaschis, èn quai ussa anc 1950. Il singul menaschi dentant cultivescha medem blera surfatscha, en media tranter 30 e 40 hectaras e quai saja er in resultat cuntanschì cun las megliuraziuns.
![Megliuraziun Grischun 2024 Graubünden Gesamtmelioration](https://www.rtr.ch/static/cms/images/960w/9fd3c9.jpg)
La vista externa è la vista neutrala
Per Hansjörg Hassler, il president da la cumissiun da megliuraziun Trin èsi cler: «La vista externa è indispensabla per ina megliuraziun».
Ils interess individuals sajan mintgatant usche ferms ch'ins emprova d'influenzar forsa las cumissiuns. Perquai saja transparenza, neutralitad e da tractar tuts medem impurtant. In auter avantatg saja franc er ch'el enconuscha sco anteriur pur ils basegns da l'agricultura. E chel saja stà politicher saja segir nagin dischavantatg.
![Hansjörg Hassler Hansjörg Hassler](https://www.rtr.ch/static/cms/images/960w/b51a4e0.jpg)
Negina megliuraziun a Lantsch – ha er avantatgs
Avant prest otg onns ha il suveran da Lantsch refusà ina megliuraziun. Natiralmain vess il president communal Simon Willi gì gugent sustegn finanzial da chantun e confederaziun, ina megliuraziun vegn sustegnida cun enfin 80 pertschient dals custs. La consequenza dal na saja stà che la vischnanca ha da finanziar sez ils prest 8 milliuns francs.
In avantatg saja dentant ch'ins saja pli liber en las decisiuns – las leschas e prescripziuns numnadamain per survegnir sustegn da chantun e confederaziun sajan grondas. E tranter ils purs ins haja chattà ina soluziun communabla, uschia ch'ins è sa tschentà vi d'ina maisa ed ha per exempel scumpartì da nov tgi che fa nua fain.
![Lantsch](https://www.rtr.ch/static/cms/images/960w/472c61d.jpg)