Suenter las lavurs da stgavament sin l'areal «Alter Forsthof» amez Cuira è vegnì tschentà l'emprim crap da fundament per il nov edifizi «Mehrwerk». Il proxim grond pass è l'atun, lura cumenzan las lavurs da construcziun brutta. Quel duai tranter auter daventar la nova sedia principala da l'interpresa Inventx.
Sper biros per 300 plazzas da lavur tar Inventx vegnan fabritgadas 11 novas abitaziuns sin il plaun sut il tetg. Bundant in sisavel dal nov edifizi vegn duvrà per l'archiv da la citad da Cuira ch'era fin ussa en la chasa da la citad. E plinavant datti in restaurant cun bar e plazzas sut arcadas, sco er in segund restaurant per ils emploiads che duai er esser accessibel parzialmain al public.
Sco l'interpresa d'IT scriva en ina communicaziun cuminaivla cun la citad da Cuira, custa il project bundant 40 milliuns francs e l'edifizi vegn construì sin ina surfatscha da 9'769m².
Tenor il president da la citad da Cuira Urs Marti vitalisescha il project il center e rinforza la citad da Cuira sco lieu attractiv per la branscha d'informatica.
Il nov edifizi vegn a porscher ina gronda plivalur per la populaziun da la citad da Cuira
Gregor Stüchel, co-fundatur e president dal cussegl administrativ dad Inventx annunzia che la construcziun nova na vegn betg be ad impressiunar opticamain, mabain er puncto durabilitad ecologica ed innovaziun. Suenter retards pervi da recurs è el cuntent da finalmain pudair cumenzar a bajegiar. La construcziun criva cumenza quest'atun e duai vegnir finida l'onn proxim. L'onn 2024 avess l'edifizi lura dad esser pront per la midada.
La lunga via a la nova sedia dad Inventx
Gia l'onn 2016 eran ils plans sin maisa – uss vegn finalmain bajegià. Daco ha quai cuzzà uschè ditg? Ina cronologia:
2016 – la cunvegna
La citad da Cuira ed Inventx suttascrivan ina cunvegna da planisaziun per l'areal «Alter Forstwerkhof». L'interpresa vul construir là la nova sedia a Cuira e stgaffir 60 novas plazzas da lavur. Els elavuran in project per survegnir ina lubientscha da bajegiar.
2017 – il project «Mehrwerk» stat
Il bajetg na duai betg mo porscher biros per Inventx, mabain cuntegna:
- En las auzadas 3 e 4 duai dar 11 abitaziuns per affittar
- En las auzadas 1 e 2 duai dar biros per Inventx cun plaz per radund 300 emploiads
- En il plaunterren duai dar in restaurant u ina cantina, sco era ina halla ch'ins po duvrar per occurrenzas culturalas
- En il plaun sutterran è previs il nov archiv da la citad da Cuira, sco era ina garascha d'autos
L'entir bajetg custa 35 milliuns francs ed ha ina surfatscha dad 11'770 meters quadrat.
Ils 21 da matg accepta il suveran da Cuira cun 84,6% la surdada dal dretg da bajegiar ad Inventx. Il president da Cuira Urs Marti vesa il Gea sco schanza per la citad: D’ina vart possia Cuira sa sviluppar tar in lieu per fatschentas spezialisadas sin informatica e da l’autra vart procurian ils collavuraturs da la firma per vita en il coc da la citad.
I dettia uss anc da sclerir singulas dumondas da vischins en connex cun l’autezza dal bajetg. Tut saja dentant sin buna via.
2018 – i va tuttina pli ditg
Encunter il project vegn inoltrà in recurs. In u plirs vischins na vulan betg, che Inventx construescha ina chasa davant lur nas. La cumissiun da construcziun examinescha quest recurs, refusa dentant el. Pervi d'adattaziuns vi dal tetg – che la cumissiun da construcziun pretenda – vegn era la lubientscha da bajegiar pir mez favrer.
Il mars vegn fatg recurs cunter il project tar la Dretgira administrativa dal Grischun. Ils responsabels dad Inventx speran che la dretgira decidia la fin da la stad en chaussa. Il medem mument sajan els en discurs bilaterals cun ils recurrents per chattar in'eventuala soluziun. Il mument vul Inventx restar tar il lieu da construcziun a Cuira «uschè ditg che quai fa senn er economicamain».
Perquai che l'emprima fabrica da gas da la citad da Cuira sa chattava sin l'areal, è quel contaminà cun substanzas nuschaivlas. l'onn 2018 ha la citad concedì in credit da 1,5 milliuns francs per allontanar ils stabiliments e sanar il funs contaminà. Uss vegn quest plan realisà.
2019 – il provisori
Perquai che la Dretgira administrativa dal Grischun n'ha anc adina betg decis davart il recurs cunter il project «Mehrwerk», vegn stgaffi ina dimora provisorica per radund 60 emploiads dad Inventx. Quai en la remisa veglia da locomotivas a la staziun da Cuira.
2020 – i va vinavant, u tuttina betg?
Il schaner dat la Dretgira administrativa glisch verda per il project. Gia in mais pli tard suonda dentant il proxim stop: Il recurs vegn tratg vinavant al Tribunal federal a Losanna. In convischin fa valair raschuns da la tgira da monuments cunter il project.
2021 – finalmain
L'october 2021 decida il Tribunal federal sco davosa instanza a favur dal project «Mehrwerk». Cunquai po Inventx definitivamain bajegiar. La suprastanza da Cuira beneventa la decisiun:. Finalmain possian ins realisar il project ed uschia revitalisar la surfatscha ch'è oz terren betg nizzegià.
2022 – scuverta surprendenta
Durant las lavurs da construcziun chattan lavurers en il grip davos il plazzal in bajetg sutterran. I sa mussa che quai è in'anteriura «Luftschutzalarmzentrale» – classifitgada sco «secreta» da la citad.
Ils 16 d'avust 2022 è vegnì mess l'emprim crap da fundament per il nov bajetg. E sche tut va tenor plan è l'edifizi pront l'onn 2024.