Siglir tar il cuntegn

Header

video
Mia vita, mes mintgadi – Emanuel Nay
Or da RTR Social dals 20.01.2023.
laschar ir. Durada: 13 minutas 29 Secundas.
cuntegn

Mia vita, mes mintgadi Emanuel Nay: «Jau intermediesch la savida cun ils mauns»

Mia vita, mes mintgadi – oz cun l’istorgia dad Emanuel Nay, ch’è la cumprova ch’ins sa dir tut mo cun ils mauns.

Emanuel Nay da Laax è magister. Sch’el instruescha discurra el cun ils mauns – betg per excepziun ma per regla. El è magister senz’udida per persunas senz’udida e perquai instruescha el sia terza secundara a Turitg en la lingua da segns.

A guardar durant la lecziun en scola pudess ins pensar, che tuts sa chapeschan perfetgamain – er sche la scolara ed ils scolars èn da differents pajais. Quai n’è dentant betg vair. Mintga pajais ha sia atgna lingua da segns. L’unic che tut questas linguas han en cuminanza è ch’i vul adina ils mauns.

Da pudair intermediar a persunas senza udida saja enormamain impurtant – zunt perquai che questas persunas n'han betg il medem access a meds da communicaziun sco la gronda part da nus. Persunas d'instrucziun che n'audan sez betg, dettia quai memia paucas:

Per giuvenils senza udida èn magisters senza udida in model fitg impurtant.
Autur: Emanuel Nay magister en lingua da segns, Laax/Turitg

Emanuel Nay è magister cun corp ed olma. Sch'ins considereschia, che 90% dals uffants, che n'audan betg, hajan geniturs che audan e sappian perquai betg la lingua da segns, saja quai eminent impurtant, da dar access a furmaziun als uffants.

Per Emanuel Nay èsi quiet

Emanuel Nay pendulescha tranter ses lieu da lavur Turitg e ses dachasa a Laax. Ad ina staziun da tram amez citad discurrin nus, cun agid da la traductura da segns Heidi Stocker, da quai che Emanuel Nay auda u n'auda betg:

En questa situaziun èsi tut ruassaivel per mai, perquai che jau n'aud nagut.
Autur: Emanuel Nay persuna senza udida, Laax/Turitg

Ses apparats d’udida levgiassan bain la communicaziun cun autras persunas. Lingua discurrida na chapescha el dentant betg. Ed amez Turitg èsi tut quiet per el, quinta Emanuel Nay.

Emanuel Nay e sia vita, ses mintgadi en maletgs e cun agid da la traductura da segns Heidi Stocker chattais vus qua – e qua èn ils purtrets da Tanja e Bond, Matteo De Pedrini, Cilgia Nuotclà e Pascal Leinenbach.

La seria «Mia vita, mes mintgadi – viver cun impediment»

Avrir la box Serrar la box

Nus na discurrin u analisain, nus mussain: En ina seria da tschintg purtrets stattan tschintg persunas cun impediments en il center. Els ed ellas n’èn betg be il tema, ma las protagonistas e protagonists da lur atgnas istorgias.

Nus accumpagnain Emanuel Nay, Tanja Zentriegen cun ses chaun d’assistenza Bond, Matteo De Pedrini, Cilgia Nuotclà e Pascal Leinenbach tras lur mintgadi a Laax e Turitg, Cuira, Son Gagl, Scuol e tras l’Engiadin’Ota e faschain uschia in toc via ensemen cun ellas ed els.

Nus essan a chasa ed en scola, en il tren ed en il bus, en il Fürstenwald u en la Sinergia, en la Chasa editura u en la bar – simplamain dapertut là, nua che nus tuts e tuttas essan er.

RTR actualitad

Artitgels legids il pli savens

Scrollar a sanestra Scrollar a dretga