Siglir tar il cuntegn

Header

video
Mia vita, mes mintgadi – Pascal Leinenbach
Or da Giuventetgna dals 20.01.2023.
laschar ir. Durada: 16 minutas 14 Secundas.
cuntegn

Mia vita, mes mintgadi Pascal Leinenbach: «Vesair ves'ins mo cun il cor»

Pascal Leinenbach è tschentà a la maschina da sfender laina ch’el di: «Jau ves nagut, nagut, nagut.» El era 18 onns ch’in accident ha prendì ad el la vesida. «Mabain», raquinta Pascal oz, «igl è uschia» ed el haja stuì far il meglier londeror. El haja emprendì, ch’ins vesia mo cun il cor.

Grazia che jau sun vegnì tschorv hai jau emprendì che guardar guardas cun ils egls, ma vesair vesas be cun il cor. Mintgatant pens jau, bain, forsa eri pli facil da betg esser tschorv. Mabain, igl è uschia. Ed i va bain er uschia, gea.
Autur: Pascal Leinenbach Malögia

Cun channa alva e 150% sin via e tras la vita

Ad accumpagnar el tras ses mintgadi da sia lavur a l’ufficina protegida da l’uniun Movimento a Samedan fin tar sia nonna a chasa a Malögia crai ins quai er ad el.

Il di che nus sa scuntrain hai navì. Pascal Leinenbach è en viadi cun sia channa alva. Igl è stentus, bletsch e dad aut ed jau hai mirveglias co ch’el fetschia da s’orientar:

Ina chaussa è il trenament. Ti has dad emprender quai. E l’autra è fitg gronda concentraziun. Perquai che ti has da guardar cun las ureglias, cun la bachetta e ti has la naiv, autos, persunas che vegnan envers tai. Ti has adina dad esser concentrà silmain 150%.
Autur: Pascal Leinenbach

Quai saja in stress e la saira cura ch’el turnia a chasa saja el mintgatant fitg, fitg stanchel. E tuttina: Pascal raquinta en rumantsch, talian e tudestg. El sa englais e portugais, viagia sulet si e giu per l’Engiadina e discurra sco in cudesch. «Sas,» di el, «jau vi viver.»

L'impediment betg visibel sco sfida anc pli gronda

Quai fa el malgrà ch’el ha anc in segund tema ch’occupa el dapi ses accident. El ha in trauma dal tscharvè frontal e quai saja ina chaussa pli cumplitgada.

En mes egls è quai la sfida anc pli gronda co la tschorvadad. La tschorvadad, quella ves’ins. Ah, quel cun ils egliers da sulegl e la channa alva, quel è tschorv. Ma quel problem che jau hai, il trauma dal tscharvè frontal, quel na ves’ins.
Autur: Pascal Leinenbach Malögia

Pervi da quel trauma fa Pascal mintgatant, senza ch’el vuless propi, in u dus u er trais sgnoccas da memia. Memia bler per quellas u quels che scuntran el. Ed en sasez èsi er da memia per Pascal Leinenbach sez, ma igl è ses tscharvè, che sa metta da las giadas per travers.

Quai è vaira, gea. Mintgatant èsi uschia. Mabain, jau vegn a stuair emprender dad ir enturn er cun questa chaussa, gea.
Autur: Pascal Leinenbach Malögia

Sia vita, ses mintgadi chattais vus qua – e qua èn er ils purtrets dad Emanuel Nay, Tanja Zentriegen e Bond, Matteo De Pedrini e Cilgia Nuotclà.

La seria «Mia vita, mes mintgadi – viver cun impediment»

Avrir la box Serrar la box

Nus na discurrin u analisain, nus mussain: En ina seria da tschintg purtrets stattan tschintg persunas cun impediments en il center. Els ed ellas n’èn betg be il tema, ma las protagonistas e protagonists da lur atgnas istorgias.

Nus accumpagnain Emanuel Nay, Tanja Zentriegen cun ses chaun d’assistenza Bond, Matteo De Pedrini, Cilgia Nuotclà e Pascal Leinenbach tras lur mintgadi a Laax e Turitg, Cuira, Son Gagl, Scuol e tras l’Engiadin’Ota e faschain uschia in toc via ensemen cun ellas ed els.

Nus essan a chasa ed en scola, en il tren ed en il bus, en il Fürstenwald u en la Sinergia, en la Chasa editura u en la bar – simplamain dapertut là, nua che nus tuts e tuttas essan er.

Or da l'archiv

video
Di d'acziun per persunas tschorvas en il traffic
Or da Telesguard dals 15.10.2021.
laschar ir. Durada: 3 minutas 25 Secundas.

RTR actualitad

Artitgels legids il pli savens