Siglir tar il cuntegn

Header

cuntegn

Midada d'urari Dapli traffic public e novas tecnologias

Il traffic public vegnia puspè nizzegià sco avant la pandemia da Covid-19, scriva la regenza. Il dumber da passagiers è actualmain sur il nivel da l'onn 2019. Medemamain sajan ils basegns dals passagiers e passagieras sa midads. En il temp liber vegn viagià dapli cun il traffic public. Quai ha manà la stad ad in record per las interpresas da transport en il Grischun. En consequenza extenda il chantun Grischun cun la midada d'urari dals 11 da december la purschida dal traffic public.

Ina survista

  • La Viafier retica cursescha cun in nov RegioExpress da Cuira–Tusaun–Cuira. Cun fermada a Domat, a Panaduz ed a Razén. Cun l'existent munta quai ch'i dat sin quest traject in tact da mes'ura.
  • Las fins d'emna ed ils firads vegnan introducids il tact da mes'ura per l'InterCity tranter Turitg e Cuira sco er mintgamai dus pèrs da trens InterCity cun colliaziun directa per Berna, Losanna e Genevra.
  • A Domat datti novas colliaziuns cun il bus da Cuira.
  • A Favugn e Trimmis vegn augmentà la purschida dal bus da Cuira.
  • Las lingias impurtantas da la regiun d'Alvra survegnan da nov in tact da mes'ura.
  • La purschida per l'Arena Alva vegn engrondida.
  • Samnaun survegn dapli colliaziuns da bus.
  • Sursaissa survegn dapli colliaziuns da bus.

Trens d'ala – ina nova tecnica

Ina novaziun sin la rait da la Viafier retica è il manaschi da sparter ils trens che van da Landquart a San Murezzan respectivamain Tavau. Grazia ad in accuplament automatic pon tar quest manaschi dus trens vegnir unids ad in tren e quel puspè vegnì spartì a dus trens automaticamain. Il grond avantatg è quel, che duas differentas staziuns finalas pon vegnir cuntanschidas cun il medem tren senza ch'ins sto midar tren. Per direcziun vegnan a cursar mintga di set trens che pon vegnir spartids, la fin d'emna otg da quests trens.

Nos sistem da vendita en plirs pass

In'ulteriura novaziun è il sistem da vendita «Venda» ch'è cumplettamain digital. Per la midada da l'urari vegn quel introducì a Tavau. Las clientas ed ils clients pon da nov chargiar lur bigliet sin il Swisspass ubain sin ina carta da banca, sche la funcziun senza contact è activada. Pajà poi vegnir cun la carta u per quint. L'introducziun en la Val dal Rain Grischuna ha lieu il cumenzament dal 2023 ed en l'Engiadin'Ota (consorzi tariffar engadin mobil) la primavaira 2023. Las ulteriuras regiuns dal chantun vegnan equipadas cun «Venda» il cumenzament dal 2024.

RTR novitads 10:00

Artitgels legids il pli savens

Scrollar a sanestra Scrollar a dretga