Siglir tar il cuntegn

Midada da lescha va en vigur Tgira d'uffants vegn pli favuraivla a partir da la stad

En il Grischun vegn la tgira d'uffant cumplementara a la famiglia pli favuraivla a partir dal prim d'avust 2025. La regenza metta en vigur la revisiun totala da la lescha correspundenta. Grazia a quella duajan las cundiziuns esser per tut las famiglias las medemas.

A partir dal prim d'avust 2025 entra en vigur en il chantun Grischun ina lescha per promover la tgira d'uffants cumplementara a la famiglia ch'il Cussegl grond aveva deliberà. Questa nova lescha, enconuschenta sco KIBEG, duai meglierar da cumbinar la professiun cun la famiglia cun reducir il squitsch finanzial dals geniturs ed a medem temp augmentar la qualitad, sco er las purschidas da canortas. Plinavant duai la lescha garantir ch'ins tracta tut las famiglias en il chantun medem ed er las cundiziuns generalas per la tgira dals uffants duain vegnir meglieradas. Questas midadas na duain betg mo augmentar la qualitad da viver da las famiglias, mabain er cumbatter la mancanza creschenta da persunas spezialisadas sin il martgà da lavur.

Midada da sistem tar la finanziaziun

Cun la midada da sistem da l'uschenumnada finanziaziun da l'object a la promoziun sin basa da la finanziaziun dal subject vegnan las famiglias en il chantun Grischun sustegnidas pli fitg. Il sustegn finanzial per las famiglias variescha tenor las entradas. Famiglias cun entradas sut 40'000 francs pon survegnir in sustegn da fin 90% dals custs normads, entant che famiglias cun entradas sur 130'000 francs survegnan in sustegn da 25%.

Nov calculatur online

Per stgaffir transparenza e per simplifitgar a famiglias la calculaziun individuala vegn mess a disposiziun in calculatur online. Quel permetta als geniturs da calcular svelt ed a moda simpla lur respargns pussaivels tar ils custs da tgira.

Pagina dal chantun

Custs normads e tariffas maximalas

La regenza ha fixà da nov ils custs normads tenor vegliadetgna dals uffants. Quests custs normads servan sco basa per calcular las reducziuns:

  • uffants a partir da 18 mais fin l'entrada en la scola primara: 10.60 francs per ura da tgira
  • uffants da 3 fin 18 mais: 15.90 francs per ura da tgira
  • uffants a partir da l'entrada fin a la fin da la scola primara: 5.30 francs per ura da tgira

Per evitar svilups extrems dals pretschs tar las purschidas da tgira èn vegnidas fixadas tariffas maximalas che ston vegnir resguardadas. Ellas importan 150% dals custs normads.

Scolaziun e sustegn per canortas

La midada al sistem nov pretenda in'adattaziun da vart da las canortas. Ellas vegnan scoladas il matg 2025 davart la midada da sistem e davart la nova applicaziun «quint».

Or da l'archiv:

RTR novitads 09:00

Artitgels legids il pli savens