Quai ch'avess duì meglierar la cumpatibilitad da famiglia e professiun, e ch'avess duì far frunt a la mancanza da persunal, maina tar tschertas famiglias a problems.
In sguard enavos
Dapi l'avust 2025 vala in nov sistem tar la tgira d'uffants en canortas. Da nov annunzian geniturs e canortas ils uffants al chantun – lez calculescha las subvenziuns sin basa da la decleranza da taglia dals geniturs. Las subvenziuns paja il chantun direct a la canorta. L'intenziun da la midada da sistem era atgnamain buna:
La lescha vuleva atgnamain che la cumpatibilitad da famiglia e professiun daventia meglra. Ma ussa è la realisaziun da la lescha gist il cuntrari.
Nora Kaiser di che pliras famiglias sajan sut squitsch. Geniturs pondereschian da reducir lur pensum da lavur u il dumber da dis en canorta. Gist il cuntrari da quai ch'il chantun vuleva cuntanscher. «Ussa survegnan las famiglias ils emprims quints tenor sistem nov e realiseschan, che quai munta in squitsch per lur finanzas.» Il problem vesa Nora Kaiser tar l'autezza dals custs ch'il chantun ha fixà per in'ura tgira d'uffants en canorta. Ils uschenumnads «custs da norma» na paran betg da cuvrir ils custs reals da las canortas.
Datas fidablas pir il 2026
Il president da la regenza, Marcus Caduff, defenda il nov sistem en in'intervista cun la gasetta Südostschweiz. El accentuescha che surtut famiglias cun entradas sut 100'000 francs profiteschian. Per ina valitaziun definitiva saja quai dentant anc memia baud. Pir il 2026 vegni a dar datas fidablas ed alura pudess ins far eventualas adattaziuns.
Per Nora Kaiser è quai memia tard. Ella pretenda ina reacziun svelta dal chantun: «Fin che l'analisa è fatga, e lura er adattaziuns, èn segir passads dus onns. E quai è ina mesa generaziun d'ina vita en canorta. En quel temp èn bleras famiglias s'organisadas auter.»
La debatta davart il nov sistem da canortas en il Grischun vegn a cuntinuar. Igl è cler: Quai ch'era pensà sco meglierament, ha almain per intginas famiglias in effect cuntrari. Uschia sa reuneschan divers geniturs en gruppas da WhatsApp per discutar il tema intensivamain, e tschertgar ensemen soluziuns. Questa solidaritad tranter las famiglias pertutgadas mussa cleramain, quant urgent ch'il problem è daventà.