Malgrà ch'i dess mumentan ina gronda schelta da fluras, na sgolan ils avieuls betg ora cun temperaturas bassas. Tenor Patrick Müller, suprastant da l'uniun d'apiculturs dal Grischun, ston ils avieuls perquai per il mument sa nutrir da lur reservas da pavel en l'avieuler. Tras quai pudess la reserva da pavel daventar stgarsa, pavlar zutger supplementar saja tenor Patrick Müller bain pussibel, ma diminuiss la qualitad dal mel.
Plaz stretg en l'avieuler
In'ulteriura sfida pon esser problems da plaz en l'avieuler. La regina metta mintga di var 2000 ovs e damai ch'ils avieuls na sgolan actualmain betg or dal lieu, pudess il spazi vegnir stretg. Entras quai pudessan ils avieuls sa decider da parter si lur pievel, vul dir els tirassan si in'ulteriura regina che sgluass lura davent cun ina part dal pievel. Per evitar quai vegn Patrick Müller a controllar ils pievels uschè spert ch'i è pli chaud, per vesair sch'ina ulteriura regina è vegnida schendrada - e per allontanar quella en quest cas.
In sguard optimistic en l'avegnir
Tenor Patrick Müller pudessi esser che la racolta da mel è in pau pli pitschna, mo cunquai ch'il temp da fluriziun haja dentant gist pir cumenzà, vesia el anc bunas schanzas ch'i dettia tuttina anc ina buna racolta da mel.
Nus avain bunas schanzas, ch'ei dat tuttina ina buna raccolta da mèl.
La fructificaziun dals pumers tras ils avieuls ha tenor il Plantahof gia gì lieu en la Val dal Rain durant la perioda pli chauda, perquai na vegnia qua betg fatg quint cun ina sminuziun da la racolta da puma.
