En la firma Trumpf a Grüsch lavuran luvrants pitschens concentrads e plain precauziun. La finamira è da construir in product or da metal che stat en connex cun la firma. Quest onn sa tracti d'in plunader a motor, in vehichel circa uschè grond sco ina boxa da dultscharias, che ha glischs oranschas che targlischan e po auzar sco era sbassar la furtga. Il product d'exposiziun vegn mess ensemen en differents workshops. Ils uffants han grond plaschair dal pensum.
Nus n'avain nagin problem da motivaziun, nus stuain plitost franar ils uffants. Ma da sentir lur plaschair dal agen product fa fitg gronda allegria.
Lavur da team
Ils uffants vegnan sustegnì dals emprendists e las emprendistas da Trumpf. Quels pon, per excepziun, midar lur rolla dal scolar cun quella dal scolast. Quella incumbensa als plascha fitg, è però er ina challenge che pretenda, manegia l'emprendist Tobias Lattner. Ultra dals emprendists vegnan ils scolars er accumpagnads dals students e da las studentas da la Scola auta da pedagogia grischuna. Quai cun l'intenziun da preparar ils scolasts e las scolastas futuras sin il mintgadi da lavur, ma er ils uffants pon profitar da la constellaziun. Ina lavur communabla che resulta en ina situaziun da win-win.
Ils scolars e las scolaras construeschan, lutegian e marteleschan vinavant cun bler plaschair ed entusiassem. Il davos di, numnadamain il venderdi, pon els alura finalmain preschentar lur product final als geniturs.