Siglir tar il cuntegn

Header

cuntegn

Mobilitad persistenta Bikesharing a Cuira duai vegnir extendì

Dapi var trais mais datti a Cuira la purschida «Mooinz» – ina purschida d'emprestar velos electrics. La dumonda saja gronda. Sco che L'uniun Pro Velo Grischun communitgescha, duai la rait uss vegnir extendida.

Diesch staziuns d'emprestar velos electrics datti actualmain a Cuira. Ed ils velos vegnan duvrads fitg savens, surtut durant l'emna – pia per persunas che van a lavurar. Envers il schurnal regiunal da SRF sa mussan ils iniziants da la purschida da bikesharing fitg cuntents.

Nus pudain dir che l'utilisaziun dals velos è pli aut ch'en autras citads. Per part avain nus per velo e di in viadi.
Autur: Simon Gredig mainafatschenta da Pro Velo

Il traject duvrà il pli savens saja da la staziun da Cuira fin tar il center da l’administraziun chantunala Sinergia.

Finamira: 25 staziuns

Er il Post da coordinaziun per mobilitad persistenta vesa en il project a Cuira grond potenzial. Perquai gida la Confederaziun uss da finanzialmain. Tenor la communicaziun da Pro Velo duai la rait vegnir extendida sin 25 staziuns. Tranter auter veglian ins duvrar las datas dals users per chattar or, nua ch'ulteriuras staziuns fan segn.

Plinavant duai er dar cargobikes – pia velos cun dapli spazi per transportar chaussas. L'incumbensa per schlargiar la rait saja vegnida publitgada.

Or da l'archiv

video
Bikesharing a Cuira
Or da Telesguard dals 18.09.2023.
laschar ir. Durada: 2 minutas 29 Secundas.

RTR novitads 18:00

Artitgels legids il pli savens