In Nadal nunspectacular, uschia descriva la commembra da suprastanza da la partida verda dal Grischun ses dis da festa. Impurtant saja che la famiglia vegnia ensemen e ch’ins possia giudair uschè bler temp ensemen sco pussaivel. Uschia na stattan era betg ils regals en il center. Regalar simplamain per il fatg ch’ins haja regalà insatge cuntrafetschia a l'ideal da persistenza, uschia Anita Mazzetta.
Regalar insatge che sa tschenta curt suenter en in chantun na fa betg senn.
Perquai vegnian ils regals era spustads en il cas ch’in commember da famiglia n’è betg segir tge ch’ins giavischia. Sch’i dat tuttina pachets lura pachetescha ella quels en palpiri ch’ella fa sezza ord tastgas veglias u ch’ella dovra taila. Quai saja per ina pli persistent e per l’autra vesia quai era ora pli interessant ch’il palpiri colurà da la stizun.
Decoraziun per l’atmosfera
Malgrà ch’i dat tut tenor pli paucs regals sut il pignol, èsi per Anita Mazzetta impurtant da derasar atmosfera da Nadal en l’abitaziun cun decoraziun sco figurettas da Nadal. Ella conceda che betg tut sia decoraziun saja fatga ord material natiral. Quai cumpensescha ella dentant cun tegnair si ditg tut la decoraziun e da duvrar ella mintg’onn danovamain. Da l’autra vart fa ella era sezza decoraziun, per exempel ord miscalcas.
Charn è lubì
Anita Mazzetta sustegn l’opiniun ch’ins dastga era ina giada far in’excepziun puncto charn, en spezial tar festas grondas sco Nadal. Igl è enconuschent che la producziun da quella chaschuna grondas emissiuns. Perquai saja impurtant ch’ins reduceschia il consum sin in minimum. Sch’ins guardia l’entir onn ora dad esser persistent, lura dastgain ins era cun buna conscienza giudair in toc charn. Sch’i dat in fondue chinoise, bourgignonne u tuttina tut insatge auter n'ha Anita Mazzetta betg anc decidì. Impurtant saja ch’i giaja svelt, uschia ch’ins haja dapli temp per sa focussar sin la famiglia.
