Sch’ins na vul betg cumprar insatge che sa tschenta curt suenter Nadal en il chantun, lura èn ils padrinadis ina buna alternativa. In’alternativa che fa era suenter Nadal anc plaschair e ch’è ultra da quai era persistent.
Padrin u madritscha d’ina entira populaziun
In padrinadi pli spezial porscha la cuminanza d’interess «Biene» da la Svizra orientala. Là pon ins daventar padrin u madritscha d’ina entira populaziun d’avieuls. Sper in magiel da mel biologic survegnan ins ina platta da laina ch’igl è da colurar. Suenter colurar e returnar la platta vegn quella fixada vid l'avieuler. Tenor Viktor Siegrist da la cuminanza d'interess, s’orienteschan ils avieuls lura vid quest motiv, uschia ch’els sappian nua ch’els èn da chasa.
Pli enconuschents èn ils padrinadis d’animals dal WWF. La manadra dal WWF Grischun, Anita Mazzetta, declera ch’ins possia sa decider per ses animal preferì, sco il tigher u l’elefant e possia cun sia finanziaziun promover projects per engrondir il spazi da viver da quests animals. Per uffants datti anc in’autra varianta, numnadamain «l’adopziun». Sa chapescha n’adopteschian ins betg in animal selvadi, mabain survegnian ins in animal da plisch – quai che saja per uffants pli pitschens in regal adattà.
Ina mailer per l’entira famiglia
A Rodels ha l’uniun da puma dal Grischun Central stgaffì in iert cun passa 40 mailers da sorts periclitadas. E là pon ins era sa participar cun in padrinadi e laschar cultivar ses agen mailer. Il padrinadi custa 1'000 francs e cuntegn l’entira tgira da la plantina enfin ch’ella è creschida e na dovra betg pli sustegn. La presidenta da l’uniun, Martina Mändli, declera ch’ils padrins e madritschas vegnan eternisadas sin ina plachetta sper l’iert. En emprima lingia stettia la cultivaziun en il center, ma tuttina saja l’uniun averta da stgaffir bilateral vias per pudair racoltar la puma dal mailer.
