Tenor la Revo Hospitality Group è la serrada dal Seehof part d’ina strategia per optimar las operaziuns tranter lur dus hotels a Tavau: il Hotel Seehof e il Grandhotel Belvedere. En ina resposta scritta sin dumonda da RTR ha la gruppa declerà che las reservaziuns existentas vegnian transferidas al Grandhotel Belvedere, che vegn a reavrir sias portas per la stagiun da stad.
L'hotel avria puspè las portas per la stagiun d'enviern 2026/2027. Per inqual collavuratura e collavuratur vul quai dir tschertgar ina nova plazza. «Ils collavuraturs vegnan per part surpigliads en il Belvedere u sustegnids en la tschertga d’autras plazzas en la regiun», ha scrit David Rollik, represchentant da la gruppa.
La novitad da la serrada dal Hotel Seehof è vegnida annunziada be curt avant l’avertura da la stagiun da stad. Quai ha provocà critica da la branscha da hotellaria.
Il president da Hotellaria Svizra Grischun Ernst Wyrsch ha exprimì sia dischillusiun davart la mancanza da communicaziun anticipada ed ils fastidis per ils giasts. «La decisiun da serrar per colliar las sinergias è chapibla, ma il mument da l’annunzia è problematic», ha el declerà a RTR. «Ils giasts vulan ir là nua ch’els han reservà, betg vegnir spustads.»
Ils giasts vulan ir là nua ch’els han reservà, betg vegnir spustads.
Malgrà las sfidas actualas da la Revo Hospitality Group, che cumbatta cun problems finanzials en autras regiuns, restan ils responsabels optimistics per la stagiun d’enviern. Sco ch'els scrivan, na sajan ils hotels svizzers betg pertutgads da proceduras d'insolvenza. Quellas pertutgian be chasas en Germania, Austria ed ils Pajais Bass.
La stagiun d’enviern saja lucrativa, approva era Ernst Wyrsch. Forsa dettia in affittader, u che las luccas finanzialas vegnian serradas fin lura, ha ditg in expert da la branscha.
Per Tavau e ses abitants resta la speranza ch'il Seehof, cun sia lunga tradiziun, possia puspè prosperar en il futur.
