L'iniziativa d'emprimas abitaziuns è vegnida inoltrada l'onn passà da represchentantas e represchentants da la Partida socialdemocratica, la Partida verd-liberala e la Partida evangelica svizra. Ella ha la finamira da reducir la ferma midada d'utilisaziun d'emprimas abitaziuns – en bajetgs existents u edifizis che remplazzan quels – en abitaziuns secundaras.
L'iniziativa pretenda che almain la mesadad da las abitaziuns che resultan sco emprimas abitaziuns vegnian mantegnidas en cas da reconstrucziun, repartiziuns u edifizis cumpensatorics novs. La regulaziun vala per tut ils edifizis cun almain duas abitaziuns.
Dapi che las stgars 900 suttascripziuns èn vegnidas inoltradas vala a Tavau ina zona da planisaziun. Per cuntanscher uschè svelt sco pussaivel ina soluziun efficazia e proporziunala e per stgaffir segirezza da planisaziun èn las partidas localas da Tavau sa messas a la maisa da tractativas cun represchentantas e represchentants dal comité d'iniziativa.
Cun success: Tschintg da sis partidas participadas èn sa cunvegnidas cun il comité ad ina soluziun cuminaivla. La Partida liberaldemocratica, che sustegna medemamain la direcziun da la proposta communabla, vegn a fixar sia posiziun definitiva pir suenter sia radunanza generala.
La nova proposta
Per la proposta actuala duai la regulaziun valair pir en edifizis cun almain quatter abitaziuns. Plinavant ha persvadì l'idea d'introducir ina taxa substitutiva da unicamain 4'500 francs per meter quadrat. Cun quella duai la quota d'emprimas abitaziuns da 50% vegnir dividida en ina part fixa ed en ina part flexibla da mintgamai 25%.
Co vinavant?
Sco proxim pass ha cumenzà ils 10 d'avrigl 2026 la cooperaziun publica, nua che tut las persunas interessadas pon plazzar online lur resuns. Sch'il vast consens duess sa mussar er en questa consultaziun ed alura en il cussegl cirquital, pon las votantas ed ils votants decider gia ils 27 da settember 2026 davart il project.
Il comité d'iniziativa è s'obligà da retrair sia iniziativa dal pievel, sch'il project communabel vegniss acceptà en la votaziun dal pievel. Uschia po era la zona da planisaziun vegnir abolida.