A chaschun da la radunanza communala dals 21 november èsi vegnì a Valsot tranter auter orientà davart ils custs ed il project final per realisar set abitaziuns per indigens en l'anteriura chasa da scola a Ramosch. La decisiun finala per quest project vegn però pir prendida durant la radunanza da preventiv da mez december 2025.
En l'anteriura scola da Ramosch duain vegnir realisadas set abitaziuns pajablas per indigens. Per quest intent aveva la populaziun da Valsot gia deliberà in credit da planisaziun da 50'000 francs la fin dal 2023. Plinavant ha i quest er dà ina revisiun totala da la planisaziun communala, che ha prendì la chasa da scola ord la zona per stabiliments publics ed ha mess quella en la zona da vischnanca. Quai è la fin finala er stà premissa per insumma pudair realisar il project d'abitaziuns per indigens.
Ils scolars e las scolaras da Ramosch van ensemen cun tut ils ulteriurs uffants da la vischnanca da Valsot dapi il 2024 a scola a Strada.
Decisiun definitiva mez december
L'onn passà durant la stad ha la vischnanca da Valsot lura preschentà il project victur da la concurrenza. A la radunanza communala èsi vegnì infurmà davart ils custs finals dal project, plinavant èsi per il president communal impurtant dad infurmar ordavant sur dad in project sumegliant.
Ussa ha la populaziun la pussaivladad da discutar sur dal project.
Set abitaziuns per indigens
Il project victur da l'architect Urs Padrun da Guarda, prevesa da realisar set abitaziuns en il stabiliment. Tenor il president communal Peder Caviezel haj dà mo pitschnas midadas dal project. Previs en duas abitaziuns da quatter e mez stanzas, quatter da trais e mez ed in studio. Plinavant preves'ins da vender ina u l'autra abitaziun empè da dar a fit.
La finamira da la vischnanca e da cuntanscher ina nulla naira tar la finanziaziun.
Tar il project da las abitaziuns na sa tracti betg da l'emprima iniziativa da la vischnanca da Valsot per crear u sustegnair ideas d'interess public. Er la nova butia a Ramosch – ch'è vegnida construida sin la plazza da scola a Ramosch ed inaugurada l'onn 2023 – è er gia vegnida realisada cun sustegn finanzial da la vischnanca. Plinavant ha Valsot er realisà in'ustaria en l'anteriura chasa da scola a Tschlin.