Las prognosas che Vaz ha fatg mussan che fin il 2031 mancan circa 500 abitaziuns per indigens. La fundaziun che la vischnanca politica vuless fundar ensemen cun la vischnanca burgaisa ha en mira da realisar spazi d'abitar pajabel.
La vischnanca politica metta a disposiziun a Valbella ina parcella d'ina grondezza da 4'300 meters quadrat e la vischnanca burgaisa metta a disposiziun ina bunamain medem gronda parcella a Zorten. Vinavant portan ellas mintgamai 250'000 francs en la fundaziun per finanziar ils emprims pass e per lantschar il project.
Nov spazi d'abitar
L'idea è da realisar sin las parcellas a Valbella e Zorten mintgamai duas fin trais chasas da pliras famiglias uschia ch'i pudess dar 20 fin 25 abitaziuns per indigens. L'atun decida il parlament da Vaz, entschatta da l'onn che vegn duai lura il suveran savair decider.
Il mument dentant èn averts anc recurs da planisaziun per la parcella a Valbella ed uschia saja tut anc avert quant ditg che quel recurs retardescha il project e la planisaziun, uschia il president communal da Vaz Maurin Malär.
Situaziun tendida
La situaziun d'abitaziuns per indigens a Vaz saja fitg tendida, accentuescha Malär. De facto hajan ins schon plirs onns naginas abitaziuns vidas. Per ina vischnanca turistica saja impurtant d'avair spazi d'abitar per las persunas che vulessan vegnir a lavurar en la regiun u en vischnanca. Da chattar ina abitaziun e quai er anc pajabel saja ina fitg gronda sfida – la fin finala saja quai in punct fitg impurtant per esser ina vischnanca attractiva d'abitar.
Or da l'archiv:
Il spazi d'abitar pajabel è ina tematica che fatschenta adina dapli vischnancas en l'entir chantun Grischun. Perquai vul era la regenza grischuna metter in focus sin questa problematica: