In'analisa da las scolas autas da Cuira mussa ch'i manca per il mument circa 620 chombras. Quai pertutga era las studentas ed ils students che vegnan da l'exteriur. Patrik Degiacomi, il suprastant da la citad da Cuira, numna questa situaziun ina gronda sfida, perquai che pliras studentas e students èn interessads da studegiar a Cuira, han però desistì pervi da la mancanza da spazi d'abitar.
Nus savain da scolas autas che intgins interessents na studegian betg qua, perquai ch'els na chattan nagina pussaivladad d'abitar. E quai è natiralmain desastrus.
Sche las studentas ed ils students na chattan naginas chombras, dettia quai ina schletta glisch sin la citad da Cuira.
Dapi il mars datti ina gruppa da lavur che sa fatschenta da questa problematica. Er il parlament da Cuira ha surdà avant in mais l'incumbensa a la suprastanza da chattar ina soluziun, e da dar gas.
La citad vul agir – chantun e privats duain era s'engaschar
En in emprim pass vuless la citad examinar tge edifizis e parcellas che vegnissan en dumonda per laschar vids temporarmain. Pia chattar ed identifitgar la surfatscha che na vegn betg utilisada u planisada per auters projects. Là pudessan ins realisar spazi d'abitar che na sto tenor Degiacomi era betg per forza ed adina esser edifizis stabels, mabain pudess era esser spazi d'abitar temporar – sco per exempel cun containers da lain. Quai na saja però betg mo chaussa da la citad. Mabain er il chantun u privats pudessan gidar.
La citad po procurar mo per ina part dal spazi d'abitar
Pussaivel fiss però era che la citad da Cuira construiss sezza abitaziuns sin parcellas che na vegnan betg duvradas. Sco exempel numna Degiacomi la surfatscha da l'anteriur parcadi da l'anteriura plazza da ballape Fortuna (ussa chasa da scola Fortuna).
Ina parcella ch'è gist sper la chasa da scola Fortuna, l'anteriur parcadi da l'anteriura plazza da ballape, fiss in'opziun per far insatge.
A curta vista vegniss la citad mo da cuvrir dus terz da las 620 chombras che mancan. A lunga vista dettia er in project d'ina chasa per students. Quella emprova la FHGR da realisar. Dentant durass quai anc ulteriurs 10 onns, di Patrik Degiacomi.
In'idea da Turitg che pudess gidar
Quai ch'è cler per Patrik Degiacomi è che Cuira sto agir per restar in lieu da furmaziun per ses 3000 studentas e students – e latiers tutga il spazi d'abitar. Ina part cun ponderar da construir sezza, in'autra part però era da privats. Sco exempel numna Degiacomi ina uniun a Turitg che prenda a fit abitaziuns e las utilisescha temporarmain sco abitaziuns per students – e furma uschia ina rait d'abitaziuns.