Chattar in'abitaziun al Lai da Genevra è oz ina sfida. Diesch candidatas e candidats per in'abitaziun da 50 m² per 1'600 francs a Renens? Nagut extraordinari. En quest martgà da stgarsezza sa fa valair ina nova furma d'intermediaturs: ils chatschaders d'abitaziuns. Lur empermischun: tschertgar, visitar, eleger, mintgatant schizunt garantir in'abitaziun.
Ils pretschs per ils «chatschaders» èn però ina veritabla dschungla. «Nus pretendain ina locaziun mensila suenter la suttascripziun dal contract da locaziun», «1490 francs per ventg propostas» u er pretschs pauschals... Mintga profi ha sia atgna politica da pretschs. Ma tge chatschan els: abitaziuns u onuraris?
Yann Capt, chatschader versà d'abitaziuns en il chantun Vad, è sa declerà pront per mussar a l'emissiun da RTS Basik ses mintgadi. «Jau n'empermet betg success, jau vegn pajà tenor resultat», declera l'independent. Nagin tractament da preferenza garantescha el mabain cunzunt bler temp sin paginas d'internet spezialisadas ed ina surveglianza permanenta da las annunzias.
Indemnisaziun dubla tenta
Ils chatschaders d'abitaziuns pon surpigliar trais geners d'incumbensas: La locaziun, la vendita e la re-locaziun. En l'ultim cas, cur ch'i sa tracta da chattar in locatari posteriur per in'immobiglia, poi dar la tentaziun d'ina indemnisaziun dubla: pajà da quel che tschertga, ma er da quel che vuless puspè dar d'affittar l'immobiglia, per exempel in'administraziun d'immobiglias.
A Losanna punctuescha l'interpresa Hauspass ch'els lavurian exclusivamain per persunas che tschertgan d'affittar in'abitaziun. «Nus na vegnin mai pajads d'administraziuns d'immobiglias», sincereschan ils fundaturs Ali Baghadi ed Oscar Delabranche. En ina branscha pauc transparenta «poi dar situaziuns, nua ch'i dat daners da corrupziun e provisiuns dublas», declera Oscar Delabranche. L'entir process da tschertga è optimà per minimar ils custs: la plattafurma assortescha automaticamain las annunzias, e students surpiglian las inspecziuns per las qualas els survegnan 25 francs.
Diskutieren Sie mit:
Simbol da desperaziun
Per l'expert d'immobiglias Bertrand Cavaleri è questa professiun in attest da la stgarsezza d'abitaziuns. In martgà vala a partir da 2% quota d'abitaziuns vidas sco tendì ed a partir dad 1,5% sco en ina situaziun da stgarsezza. A Genevra è questa quota il 2025 tar 0,34%. Questa situaziun stgaffescha «averturas commerzialas, manegiadas bain u main bain». El vesa en quellas perfin in «simbol da la desperaziun» da las persunas che tschertgan in'abitaziun.
Tschertas experientschas van a fin mal. A Genevra inscuntrain nus ina collavuratura d'ina organisaziun internaziunala. Ella ha pajà trais differents chatschaders d'abitaziuns. Dus èn stads nauschas experientschas: Empermischuns d'exclusivitad betg existentas, propostas d'abitaziuns ordaifer ils criteris, refusa da cuntinuar. «I duess dar ina surveglianza entras in'organisaziun u in'administraziun», di ella.
Ils profis d'immobiglias repetan adina puspè: precauziun. Controllar las referenzas, la transparenza, l'appartegnientscha ad ina uniun e betg crair che ir tar in chatschader d'abitaziuns avra tut las portas. «Las administraziuns guardan l'emprim il dossier e betg il mediatur», fa l'expert Bertrand Cavaleri endament.
