En sasez fiss a l'emprima sesida da l'onn dal parlament da Cuira stada tractandada la debatta davart l'iniziativa per abitaziuns pajablas a Cuira. Quella pretenda che la citad da Cuira stgaffescha entaifer dus onns premissas per che mintga terza abitaziun nova possia vegnir affittada per tschains da locaziun sin basa dals custs. En auters pleds: tschains pajabels, senza profit. La cuntraproposta prevesa quai per mintga quarta abitaziun.
Vegnì èsi auter
Ina debatta davart l'iniziativa n'ha betg gì lieu. La raschun: In'allianza da PPS, PLD e Center ha cun ina pitschna maioritad dad 11 cunter 10 vuschs renvià l'iniziativa. Ella va enavos tar il speditur: il cussegl da la citad.
L'iniziativa era memia pauc concreta per ina debatta fundada.
Il cussegl da la citad da Cuira duai ussa surlavurar l'iniziativa per sclerir dumondas davart la basa giuridica, las consequenzas finanzialas e, sche possessurs privats èn pertutgads.
Sin quellas dumondas avess'ins pudì furnir las respostas en la debatta, hai num davart GLP, Verds e PS. Remartgabel: L'Associaziun grischuna da proprietaris da chasas HEV ha cusseglià dacurt en ina charta al parlament da Cuira precis quella strategia - da renviar l'iniziativa, avant ch'i dat la debatta.
Igl è alv sin nair che l'Associaziun grischuna dals proprietaris da chasas vul influenzar la decisiun. Ella ha proponì da refusar, la maioritad burgaisa è suandada.
Tino Schneider sa distanziescha da quella renfatscha. Da renviar l'iniziativa saja gia avant la charta stà in tema. Ed era sche l'associaziun HEV haja gì contact cun collegas, saja quai en in sistem da milissa normal. Quai fetschian era las adversarias.
Votaziun cun retard
Fatg è che l'iniziativa fa uss ina runda supplementara tar il cussegl da la citad, avant ch'ella riva per ina segunda giada en il parlament - e lura davant il pievel. Fatg è era che l'associaziun HEV ha ussa dapli temp per plazzar agens giavischs. La votaziun vegn ad avair lieu probabel il settember, cun dus mais retard. La constituziun da la citad prevesa numnadamain che iniziativas rivan entaifer 18 mais davant il suveran. Tenor la sanestra in scandal e betg acceptabel. Tenor ils burgais in pitschen pretsch che vala la paina per pussibilitar ina debatta sin «basa fundada».