RTR: Entant essas Vus radund 100 dis en uffizi. Èsi en quest temp ì tras il chau a Vus: «Jessas, sin tge sun jau ma laschà en qua?» u plitost «Tge cletg ch’jau hai fatg questa midada!»?
Pieder Vincenz: Ils sentiments èn ambivalents. Sa chapescha ch’igl è ina grond’onur da dastgar scriver vinavant l’istorgia dal Plantahof, ina istorgia che cuzza gia 120 onns qua en quest lieu. Da l’autra vart èsi natiralmain er ina gronda sfida. Sch’jau vegn la damaun qua cun il velo a lavurar e ves tut tge che sa rimna qua al Plantahof, alura èsi natiralmain bain uschia ch’ins ha magari forsa in tschert respect da quest pensum.
Oz datti en Grischun anc bunamain 2’000 purarias. Mintg’onn va quest dumber enavos. Tge fa il Plantahof per motivar glieud giuvna da daventar pur u pura en l'avegnir?
Las midadas da las structuras na pudain nus dal Plantahof betg impedir u retegnair, quai è dà da la politica agrara e da la fiera. Nus empruvain da semtgar nossas scolaras e noss scolars sin las sfidas che spetgan suenter l’agricultura. Nus empruvain però era da mussar en scola ch’il manaschi na sto betg explicit esser pli grond per avair success a la fiera, mabain ch’i va era cun structuras pli pitschnas.
In grond tema è era la midada dal clima. Co vulais Vus schliar las sfidas da la midada dal clima?
La midada dal clima è ina fitg gronda sfida. Nus empruvain natiralmain da preparar noss scolars e nossas scolaras sin quellas sfidas. Sa chapescha na pudain nus betg dar scola oz sco avant 100 onns, mabain che quels temas actuals vegnan integrads en la scolaziun da noss scolars e nossas scolaras. Quai para a mai fitg impurtant. Er empruvain nus d'implementar qua al Plantahof la savida che vegn or dal project «agricultura neutrala al clima».
I va qua per in project che cuzza uss gia quatter onns. La finamira è da reducir emissiuns nuschaivlas.
Exact. Ina part da quai che vegn perscrutà en il rom da quest project empruvain nus d’integrar en la scolaziun dal Plantahof.
Il Plantahof en l'archiv da RTR
Dain anc in sguard sin la stad. La stagiun d’alp cumenza e cunquai vegn era la tematica dal luf puspè actuala. Tge po il Plantahof far per reducir emoziuns u problems ch’i dat durant la stad?
A mai pari surtut fitg impurtant da sustegnair puras e purs entras la cussegliaziun. Impurtant èsi era da cussegliar las alps sch’i va per il schurmetg da las muntaneras. Nus lavurain uss gist vi d'in program per chauns da schurmetg, concret vi d'in program per la tratga da quests chauns. Uschia vulain nus metter ina buna basa era per l’avegnir.
