Per mintga clic sin in titel musical han artistas ed ils artists fin ussa survegnì 0,004 frs. Quai fissan quintads enturn 4 francs gudogn per 1'000 clics. A partir da quest onn ston las singulas chanzuns dentant cuntanscher in minimum da 1'000 streams l'onn, per che la summa vegnia pajada a l’interpreta u a l’interpret. Titels cun damain che 1'000 clics na rendan finanzialmain betg pli. Pertutgads da quai èn surtut ils newcomers ed er persunas ch'èn da viadi plitost sco amaturs en la scena da musica. Sco quai che Christoph Trummer, il president da la Societad Svizra dals Artists Interprets (curt SIG) di envers SRF, haja quai ussa er consequenzas per la fiera da musica svizra. Bleras musicistas e musicists che valan atgnamain sco enconuschents van a fund e na survegnan nagins daners pli per lur products musicals.
Jau sai dad ina enconuschenta band svizra nua che 70 chanzuns na vegnan betg pli pajadas pervia da la nova regulaziun.
Pertge questas midadas?
Sco quai che Spotify scriva en in artitgel, duain ils daners che vegnan spargnads cun questa nova regla vegnir dabun a persunas cun dapli success musical. Per quels saja la plattafurma er vegnida stgaffida da lezzas uras, sco la firma scriva. Vinavant cuntanscha gist in terz da las passa 100 milliuns chanzuns sin Spotify la limita annuala da 1'000 streams. Ils auters 2/3 èn pia plitost no-names. Quai na vul dentant betg dir che questas ovras sajan main impurtantas. Per Christoph Trummer, ch'è er activ en la branscha da musica, n'èn ils raps dentant betg il problem principal.
Igl è frech e senza respect sch’ins di a nus che nossa lavur n’haja nagina valur pli. E quai mo perquai che betg tut las interpretas ed interprets han tuttina bler success.
Il motiv principal, cun il qual Spotify giustifitgescha la nova regulaziun, sajan ils auts custs da transacziun. Tar ina chanzun cun p. ex. mo 200 clics – quai fissan 80 raps gudogn – sajan ils custs administrativs pli auts ch’il gudogn per propi. Mintg'onn èn quai 40 milliuns dollars che van a perder sin questa moda. Sco Christoph Trummer di envers SRF, haja el chapientscha per quai, ma i saja er da resguardar che la gronda part publitgeschia dapli che mo ina chanzun sin la plattafurma. Sch’ins prendess pia ensemen tut las chanzuns sco in pachet, lura stuess ins er pajar mo ina giada ils custs da la transacziun. Christoph Trummer avess perquai ina meglra soluziun.
Meglier fissi sch'ins prendess ensemen tut las interacziuns d'in profil sin Spotify e guardass la chaussa en general, empè da sa focussar mo sin ils singuls titels.
Igl è in tema che chaschuna mumentan per bleras discussiuns. Per producentas e producents da musica pli pitschens e main enconuschents procuran las novas reglas da la plattafurma per consequenzas. Els fan damain profit e tar in u l'auter vegni forsa er a dar midadas da strategia en l'avegnir.
Excurs: Tgi fa il pli grond gudogn cun las plattafurmas ?
Tgi che vul giudair chanzuns senza reclama sto pajar per in abunament. Quai è ina da las funtaunas d'entradas che plattafurmas da streaming sco Spotify u Apple Music han. Las plattafurmas sezzas na profiteschan dentant betg da questas entradas. Spotify sez scriva dapi la fundaziun l'onn 2006 mo cifras cotschnas. Ma nua va il gudogn lura? Tgi profitescha il pli fitg da las entradas? Sco Flavio Tuor, producent da musica en chasa RTR declera, hajan tut las plattafurmas da streaming fatg contracts e deals cun autras firmas, cun ils uschenumnads Major-Labels. Ils trais gronds sajan Warner, Universal e Sony. La gronda part dals daners giajan a quels e betg a las plattafurmas.
Nagin sa tge che stat scrit en quests contracts, igl è in misteri. Sco savens va il gudogn als gronds ed ils pitschens na survegnan nagut.
Cun ils «pitschens» manegia Flavio Tuor las musicistas ed ils musicists pauc enconuschents che survegnan adina pli paucs daners per lur chanzuns. Senza il sustegn dals labels na survivessan ils servetschs da streaming gnanc. Enconuschentas chantaduras e chantadurs sco Lady Gaga u Ed Sheeran lavuran per ils labels e senza questa collavuraziun na vegnissan plattafurmas sco Spotify gnanc vi dals albums e las chanzuns.
Mintga medaglia ha duas varts. Plattafurmas sco Spotify, Apple Music u YouTube han er avert a nus novas portas. Tadlar musica nua ch'ins vul, cura ch'ins vul e latiers anc cun ina selecziun uschè gronda – da quai pudevan noss perdavants mo siemiar.
