Il streaming da musica numna la transmissiun digitala da cuntegns da musica sur l’internet en temp real. Enstagl da chargiar giu musica e memorisar ella sin in apparat fisic, pon utilisaders cun agid da servetschs da streaming sco per exempel Spotify, Apple Music u Deezer tadlar lur musica preferida directamain sur l’internet.
Il streaming da musica porscha ina vasta schelta d’artists, d’albums e da geners ch’ils utilisaders pon explorar tenor lur preferenzas individualas. Ultra da quai porschan blers servetschs da streaming recumandaziuns individualisadas che sa basan sin il gust d’udida da l’utilisader. Per interpretas ed interprets porscha il streaming da musica ina pussaivladad moderna da far accessibel lur musica ad in vast public e da promover lur carriera.
Malgrà ils avantatgs datti er discussiuns davart la fairness da la paja e las relaziuns da pussanza tranter artists e plattafurmas. Intgins artists argumenteschan che las structuras da pajament actualas na sajan betg gistas avunda, cunzunt per interprets main enconuschents. Tuttina èn plattafurmas da streaming ozendi ina part decisiva da la strategia da publitgar musica per blers artists.
Per mintga stream survegn l'interpreta u l'interpret mintgamai ca. 0,004 raps. Per pudair viver da quai, duvrassan ins pia mintga mais milliuns da streams. Interpretas ed interprets rumantschs na fan betg blers daners cun streaming.
L'onn 2023 hai jau gì 300'000 streams ed uschia hai jau survegnì var 400-500 francs.
Sch'in artist rumantsch fetschia passa 1'000 francs en in onn cun streaming, lura saja quai in fitg bun onn, di il rapper rumantsch. Ils blers na gudognian betg uschè bler.
Daners, daners, daners
Momo Kawazoe, la battarista da ladunna, fiss gugent en il temp nua che CD's e plattas da vinil eran anc dumandadas. Cun CDs han musicists anc pudì far daners, sco ella di. Ozendi na funcziunia quai betg pli.
Ina platta da musica aveva anc ina valita.
En la producziun da musica datti blera lavur. Er ina registraziun d'album dovria blers daners e temp.
Artists da lingua tudestga en Svizra han circa in budget quatter giadas pli aut ch'in artist rumantsch, uschia Manfred Zazzi, producent da musica.
