Realisar il project d'ina chasa da parturir a Cuira pon ins propi cumparegliar cun ina gravidanza. L’emprim è qua il giavisch, sper ils bels muments poi era mintgatant esser in zic stentus e cunzunt dovri ina massa pazienza. Sin la dumonda en tge mais che lur pop – pia lur project – sa chatta il mument, manegia Angelica Signer-Urech – ina da las iniziantas – che quel sa chatta en il 7avel mais. La finamira è plaunet palpabla ma i dat anc bler da far.
Tge è capità ils davos mais?
Da far datti propi anc inqual chaussa enfin che quest project po lura finalmain nascher. Ma emprim datti in sguard anavos.
Prest nov mais èsi, dapi che las trais dunnas da part han inizià il project d'ina chasa da parturir a Cuira e quai cun bleras dumondas avertas. Da la finanziaziun enfin il lieu ideal per ina chasa da parturir e cunzunt sche lur project dumogna insumma sin la glista uffiziala da spitals. Per daventar sin lezza dovri numnadamain contracts cun tscherts spitals ch’èn en vischinanza. Qua paran ellas uss sin buna via.
Nus essan fitg cuntentas ch'i va vinavant cun la glista da spitals.
Sche lur project n'avess betg dumagnà sin quella «glista da spitals» fiss il project spert mort. Lura n'avessi numnadamain dà nagin sustegn finanzial da la cassa da malsauns e las famiglias avessan stuì pajar las naschientschas ord lur agen satg – e quai na fiss betg l'idea dal project. La finamira è cunzunt da porscher dapli schelta – schebain a famiglias giuvnas sco era a dunnas da part.
Nua a Cuira vegn la chasa da parturir?
Ed er sin la dumonda dal lieu precis datti ussa ina resposta. La chasa da parturir vegn en in edifizi modern a Cuira Vest en la via La Nicca 8. Totalmain 320 meters quadrat èn previs.
Cunquai ch'igl è in nov edifizi èn las regulaziuns dad igiena pli simpel d’ademplir.
Angelica Signer-Urech è cuntenta cun quel plaz, schegea ch'ellas avessan gugent gì ina chasa idillica cun curtin amez la citad. Il nov edifizi porschia er ses avantatgs.
Era la vischinanza da l’autostrada discurra per quest lieu. Vinavant vegnia ch’ins po metter l'auto en la garascha e vegnir directamain cun il lift enfin l’entrada da la chasa da parturir – e quai tut anonimamain.
Gronda sfida: la finanziaziun
E co statti insumma cun la finanziaziun? Il matg 2025 avevi anc num ch'ellas dovran minimum 500'000 francs capital d'entschatta. Ussa saja quella cifra creschida sin 700’000 francs. Dapi il december sajan ellas ussa intensivamain en tschertga da daners per lur project. Tschertgà vegn tar fundaziuns ed interpresas, dentant era tar donaturs privats. A partir dal mars datti lura anc in crowdfunding nua che glieud po sponsurar l’indriz da las stanzas.
Resumà pon ins dir: I gira – era schi dovra anc pazienza – la chasa da parturir da Cuira piglia plaunet furma. Sche tut va vinavant uschia, vegnan ils emprims pops u las emprimas poppas schon primavaira 2027 en il nov edifizi a Cuira Vest sin il mund.