Abitants ed abitantas da la Obere Gasse, possessurs da chasas e da stizuns èn s'inscuntrads cun la citad da Cuira per ina runda da discussiun. 30 persunas eran preschentas en la sala dal parlament da Cuira – e la gronda part cun in nas plain da l'agir da la citad en connex cun il plazzal da fabrica tar la Obere Gasse.
Jacqueline Cavegn che posseda e maina la stizun Laki Mi ha chattà clers pleds per la gritta dals preschents en sala. La citad n'haja betg ponderà bain tge consequenzas ch'in tal plazzal ha per la citad veglia. E pervia da quai haja ins ussa da discurrer da piculezzas che disturban. Ella ha l'impressiun che la citad dat ora daners per autras chaussas, dentant betg per la citad veglia – il «cor da la citad» sco che l'interprendidra numna quai.
Cun il temp èsi vegnì cler a mai tge consequenzas che quest plazzal ed era l'agir da las autoritads vegn ad avair. Quai ha dà l'impuls da pitgar sin maisa oz.
In problem central saja la signalisaziun che manchia. Bleras passantas e blers passants – indigens sco turists – gnanc savessan che la Obere Gasse è vinavant accessibla malgrà il plazzal. Vitiers vegnia che la via na saja dapi mais betg pli vegnida nettegiada, maschinas da construcziun e vehichels giajan enturn e material da construcziun vegnia per part deponì gist davant las entradas da butias e restaurants. Tge che tuna per part da piculezzas sa cumuleschia tar ina gronda gritta.
-
Bild 1 von 3. Las butias a la Obere Gasse èn per part circumdadas da plazzals. Bildquelle: RTR.
-
Bild 2 von 3. A l'entschatta da la via na saja betg visibel ch'ins po passar. Quai retegna la clientella da passar ed entrar en las butias. Bildquelle: RTR.
-
Bild 3 von 3. Intginas persunas passan, tuttina han las stizuns fatg marcantamain damain entradas. Bildquelle: RTR.
Enfin 70% damain svieuta
«I va a nus a la vita», ha ditg Jacqueline Cavegn. Sias atgnas perditas na sajan enfin uss anc betg stadas fitg grondas, dentant be perquai ch'ella haja prendì baud cuntramesiras. Tranter auter haja ella fatg in rabat da 40% sin tut il sortiment per betg restar tschentà sin la rauba. Il medem mument ha ella fatg attent sin la situaziun da sia vischina. Quella na possia dapi trais mais betg pli pajar pajas. Locaturs sajan per part gia vegnids encunter cun reducziuns da tschains da locaziun.
Ina stizun pli lunsch, la Altstadt Manufaktur è la stizun da Willi Moser. Era el ha fatg part da la runda da discussiun perquai che sia situaziun saja actualmain difficila.
«Igl è ina ruttadira dal culiez. Sche nus na fissan betg anc ids a lavurar ordaifer, na existissan nus oz probabel gnanc pli. Suenter questa discussiun ponderain nus seriusamain, sche nus pudain insumma manar vinavant la butia. Nus avain entant notgs senza sien perquai ch'i va per l'existenza.
Durant l'entir mais da zercladur hajan els fatg ina svieuta da 500 francs. La butia saja circumdada da chavas, maschinas e mantuns da material. Sch'ins ha anc da pajar in fit, la vita, cassa da malsauns e mangiar na va quai betg si.
Tge che saja per Willi Moser impurtant è ch'ils martgads da l'emna ed era quel da Nadal vegnan fatgs en la Obere Gasse. Quai sajan dis impurtants cun bleras entradas.
Pretensiuns a la citad
A la runda da discussiun han abitantas e possessurs pretendì che la citad duai dar dapli fadia cun il plazzal. Vul dir ch'i va enavant pli spert, ch'i vegn pli net e che lur quitads vegnan prendids serius. Simon Gredig, il suprastant da la citad responsabel ha chapientscha per las situaziun – el ha stuì tragutter blera critica. Durant la discussiun conceda el che la citad haja sutvalità quant pli pauc clientella ch'intginas butias han, surtut questas ch'èn avisadas sin glieud che passa ed entra spontan.
In'autra pretensiun è, che intginas persunas duessan survegnir ina indemnisaziun per las entradas che mancan tras il plazzal.
Per pajaments d'indemnisaziun n'avain nus nagina basa legala. Quai na pudain nus betg simplamain realisar a curta vista. Per quai duvrassi ina revisiun da la lescha, e quai duvrass bler temp.
La citad vul agir a curta vista e montar reclama ed ina meglra signalisaziun per ch'i vegnia visibel che las butias a l'Obere Gasse èn avertas malgrà il plazzal.