Dapi oz vala l’obligatori da mascras era per scolars e scolaras dal stgalim superiur. La gronda dumonda era qua: Tgi ha da pajar las mascras dals scolars e da las scolaras. Pertge giuridicamain è quai sclerì nagliur, declera l’experta da dretg da SRF, Gabriela Baumgartner.
Il venderdi passà ha l’Uffizi per la scola populara e sport dal chantun Grischun dentant communitgà che las scolas sajan obligadas da porscher mascras a lur scolaras e scolars, sche quels n'hajan sez betg ina. L'argument è che la scola populara saja gratuita ed uschia stoppian las scolas era porscher las mascras gratuitamain.
Dumonda d’organisaziun
La scola dal Surses s’organisescha uschia, ch’els preparan per mintga scolarA in satget cun en mascras per l’entira emna, di il manader da scola Jörg Bühler. Il manader da scola da la scola Lumnezia propona da mintgamai dar il di avant la mascra per il proxim di. Uschia san ils giuvenils gia duvrar la mascra per il traffic public. E la scola da Glion era il venderdi anc vi da ponderar, tge sistem che saja il pli pratic, di il manader Gieri Tschuor.
La scola da San Murezzan saja gia sa disada vi da mascras. Sco la manadra da scola, Daniela Gmünder di, hajan els l'obligatori da mascras gia dapi las vacanzas d’atun. Fin uss hajan ils scolars dentant adina prendì sez las mascras. Ils blers dad els – sco en bleras autras vischnancas era – vegnian numnadamain cun il traffic public a scola.
