Siglir tar il cuntegn

Header

audio
Facit positiv da l'Olma cun Grischun sco chantun ospitant
Or da Actualitad dals 24.10.2022.
laschar ir. Durada: 3 minutas 1 Secunda.
cuntegn

Olma Son Gagl Organisaturs ed ils Grischuns èn cuntents

Ils organisaturs da l'Olma a Son Gagl tiran in facit positiv. 320'000 persunas hajan visità la fiera. Er il Grischun ch'è stà quest onn giast d'onur, è cuntent cun sia preschientscha.

En in'exposiziun speziala cun il num «simplamain da narr!» è il Grischun sa preschentà sco giast d'onur. I saja reussì da crear emoziuns positivas en connex cun il Grischun durant l'exposiziun, scriva il chantun. Ord vista grischuna han 1'100 persunas fatg part dal til, 13 furmaziuns da musica èn stadas a Son Gagl.

Tenor Daniel Camenisch, il manader dal project, saja quai gartegià. Ins haja pudì manar blers discurs cun la glieud. Las bleras da quellas persunas hajan schon ina colliaziun cun il Grischun. Dentant er bleras Grischunas e Grischuns han visità l'exposiziun.

Per mai persunalmain èsi stà fitg impressiunant da vesair quant bleras Grischunas e Grischuns ch'han gidà da purtar la preschientscha grischuna.
Autur: Daniel Camenisch Manader da project

Er ils organisaturs da l'Olma sa mussan cuntents. Sco ch'els scrivan en ina communicaziun, vegnian els a tegnair il Grischun en buna memoria sco giast d'onur. La collavuraziun saja stada fitg buna e constructiva.

Tantas persunas sco avant la pandemia

En tut hajan var 320'000 persunas visità la 79avla ediziun da la fiera. Quai sajan cifras cumparegliablas cun ils onns avant la pandemia. Ina retschertga haja plinavant mussà che trais quarts da la glieud sajan vegnids cun il traffic public a l'Olma – ina cifra che fetschia plaschair als organisaturs.

En vista a la proxima ediziun veglian ins cuntinuar cun il tema persistenza. Temas sco electromobilitad, reciclar ubain agricultura regiunala sajan aspects centrals. Gia quest onn ha in'exposiziun speziala mess il focus sin quai – tar la proxima ediziun duain quels aspects dentant anc avair dapli plaz.

video
Il Grischun sa mussa a l'Olma da sia meglra vart
Or da Telesguard dals 17.10.2022.
laschar ir. Durada: 4 minutas 35 Secundas.

RTR novitads 17:00

Artitgels legids il pli savens

Scrollar a sanestra Scrollar a dretga