- 5,4 milliuns francs gudogn
- 529'117 transports d'autos
- 5% dapli dumonda per il traffic da persunas
Dapli kilometers per persuna il 2019
Sco quai che la viafier communitgescha, hajan ils giasts fatg en tut 377 milliuns kilometers sin la rait da la Retica. Quai èn circa 20 milliuns dapli che l'onn passà. Cunzunt tar il transport dad autos ha la Viafier retica savì nudar ina cifra positiva. Tut en tut èn 529'117 autos vegnids transportads sin ils binaris ch'han resultà persul in gudogn da 1,6 milliuns francs.
Pli paucas empustaziuns tar il traffic da vitgira
Cunquai ch'il tunnel da l’Alvra saja vegnì sanà e pervia da la serrada parziala da l’Engiadina Bassa haja dà ina reducziun da la svieuta da transport da vitgira d’enturn in milliun francs.
Las investiziuns restan autas
L’onn 2019 haja la viafier retica gì in volumen dad investiziuns da 339 milliuns francs. Be per il schlargiament da la infrastructura èn vegnì duvrads 255 milliuns. Quai è in augment da 40 milliuns cumpareglià cun l’onn passà.
La malsegirtad pervi dal coronavirus
En ina communicaziun scriva la Viafier retica ch'il coronavirus haja tutgà els fermamain. Las consequenzas vegnian a sa mussar grevamain en la proxima bilantscha. I saja necessari ch’il chantun e Confederaziun dettian in agid finanzial per tegnair si dretg la purschida. En il matg èsi planisà da lantschar la purschida puspè toc a toc. Vinavant sperian els da porscher puspè ils viadis spezials sco il «Glacier Express» u il «Bernina Express» davent dal zercladur.
