Ursin Domeni sesenta sco laschà a mez lieu. El – che gieva passiunà cun auto. El – ch'era scolast dad ir cun auto e fascheva curs per prevegnir glischnadas. Mo entras il long-Covid na po el betg pli lavurar. Dus onns èn passads dapi ch'el ha gì Covid. Meglier na sa senta el dentant anc adina betg. El haja fadia cun la respiraziun ed era ses tscharvè sentia quai. «Sche jau legel insatge, stoss jau cumenzar 2-3 giadas, perquai che jau emblid quai che jau hai legì», di el.
I para sco sch'il terren vegniss tratg davent sut ils pes.
Ina giada il mais ha el fatg diever dal post da cussegliaziun en l'Ospital chantunal a Cuira. La chapientscha tar persunas che n'enconuschan betg questa malsogna saja pitschna, ed uschia era quest post per el in lieu, nua ch'el pudeva ir e discurrer sur da questa malsogna. Gia mo la cuminanza ed il barat cun autras persunas pertutgadas da long-Covid saja in agid per el. Perquai èsi per Ursin Domeni in schoc che l'ospital serra il post da consultaziun. Dad in di sin l'auter hai gì num ch'i na vegnia betg pli purschì ad el ed a radund 100 auters pertutgads quest sustegn.
L'ospital chantunal ha stuì serrar la purschida
Dus onns e mez ha l'ospital chantunal gì quest program da consultaziun da long-Covid. Thomas Fehr, manader da la partiziun medischina e commember da la direcziun da l'ospital chantunal chapeschia la frustraziun dals pertutgads. Els sajan stads in dals emprims ospitals cun questa purschida, uschia ch'els sajan quasi vegnids surchargiads cun pazients. Perfin pazientas e pazients da la Bassa hajan fatg diever da questa purschida.
Accelerà da pliras disditgas nunspetgadas en il team hajan ins realisà ch’i n’è betg pussaivel da cuntinuar sco fin uss. Ins na possia betg ristgar da far anc dapli donn al team tras la grevezza. Uss èn ils medis da chasa dumandads. Els ston manar vinavant l'assistenza dals pertutgads. L'ospital chantunal vegn er vinavant a star a disposiziun sco post da consultaziun per ils medis.
