Ospitals grischuns spetgan adina pli savens sin ils daners da pazientas e pazients. A questa conclusiun vegn ina retschertga ch'il schurnal regiunal da SRF ha fatg. En l'Ospital chantunal dal Grischun manchia circa in mez milliun francs ad onn da pazientas e pazients che na pajan betg.
Sumeglianta saja la situaziun a Tusaun. Là haja gia dà onns cun ina rusna da fin ad 800'000 francs. Las raschuns sajan diversas: Tar la glieud indigena sajan savens ils custs per ils transports da l'ambulanza in problem. Turistas e turists da l'auter maun fetschian savens indicaziuns falladas, uschia ch'il quint n'arrivia gnanc en il dretg lieu.
Sco incassar ils debits
D'incassar daners da persunas da l'exteriur è grev. Ina gronda part ston ils ospitals en il cas d'in pajament avert er surlaschar a biros d'incasso: radund 30%. Er tar pazientas e pazients da la Svizra n'èsi betg simpel. Ed i dat bler lavur. Savens lavura ina persuna sulettamain per quell'incumbensa. En l'Ospital chantunal dal Grischun èn quai schizunt duas persunas.
En l'ospital da Tusaun gartegia en radund 50% dals cas da reclamar ils daners. Tar persunas da l'exteriur gartegia en 20% dals cas. Perquai pretendan blers ospitals ina deposit tar operaziuns betg urgentas.
