Il fenomen da tschallatada e sbassaments «Schwall/Sunk» è in problem per animals e plantas. Sche ovras idraulicas produceschan electricitad crescha il livel dal flum – sche las turbinas ferman sa sbassa il livel immediat.
Questa midada ha per consequenza che l'overa da peschs vegn dischlocada e stuschada. Er poi dar variaziuns da temperatura che n'èn betg bunas.
Tras ils blers lais da fermada saja gist la regiun dal Rain anteriur, dal Rain posteriur e dal Rain alpin pertutgada fermamain da quai. Pervia da la lescha per la protecziun da las auas stoppian las ovras idraulicas regular il livel da l'aua pli ecologic, las reconstrucziuns necessarias duajan tenor lescha cumenzar il pli tard l'onn 2030.
Per realisar quai ha il chantun stuì elavurar differentas propostas. Ina soluziun pussaivla fiss da construir pitschens batschigls da cumpensaziun cun ils quals ch'ins pudess franar la tschallatada d'aua. Quai saja finanzialmain realisabel, procurass dentant per conflicts territorials e na saja ord vista ecologica betg dal tuttafatg cuntentaivel.
La soluziun la pli chara fiss da construir ovras d'agid, pia gallarias che tschiffan la tschallatada d'aua e mainan ella en purziuns puspè enavos en il flum. Tenor l'uffizi per la natira e l'ambient haja quai sper la vart ecologica er l'avantatg che quellas ovras d'agid pudessan producir electricitad supplementara.
Las propostas vegnan ussa en in proxim pass examinadas da la Confederaziun – ella vegn per part a finanziar las reconstrucziuns e decida tge proposta che duai vegnir realisada dal chantun.
