Siglir tar il cuntegn

Header

audio
Citad duai survegnir ina nova halla
Or da Actualitad dals 18.11.2022.
laschar ir. Durada: 2 minutas 42 Secundas.
cuntegn

Parlament da Cuira Ina nova halla d'event e la chasa Arcas vegn vendida

La gievgia ha il parlament da Cuira decis davart plirs projects gronds. Tranter auter che la «Stadthalle» che vegn spazzada, duai vegnir remplazzada e quai sin l'areal da l'Obere Au e che la Chasa Arcas 1 duai vegnir vendida a la vischnanca burgaisa da Cuira.

La chasa alva sin il plaz Arcas vegn vendida a la vischnanca burgaisa da Cuira per 1,5 milliuns francs. Percunter survegn la citad da Cuira il spazi avant la «Stadthalle». Là nua ch'ils parcadis sa chattan il mument. Quai per 4,2 milliuns francs.

Varianta C ha persvadì

Igl è stà ina da trais variantas ch'il parlament da Cuira ha pudì decider. L'emprima varianta fiss stada da sanar la chasa per 3,57 milliuns francs e da surdar ella a l'uniun «Kulturaumnetzwerk». Quai avess il pievel dentant anc gì da decider en ina votaziun. La secunda varianta fiss stada da far ina pli pitschna sanaziun per be 700'000 francs e da là davent affittar ella per radund 9'000 francs per mais. La maioritad dal parlament da Cuira era da l'opiniun da be simplamain laschar affittar la chasa da quel u quella che porscha ils pli blers daners. Da l'autra vart ha dentant era la varianta decidida dà da discutar. Tranter auter avess la PPS gugent vulì vender la chasa a quel u quella cun la meglra offerta.

Oriundamain era l'idea che la chasa Arcas daventi in lieu cultural. Per exempel cun duvrar las localitads sco stanzas da prova u da producziun per chors, uniuns da teater u saut. Quell'incumbensa avess l'uniun «Kulturraumnetzwerk» gì sch'ella avess survegnì la chasa Arcas per ses diever.

Betg desister d'ina halla d'event e fiera

La «Stadthalle» a Cuira è lieu ospitant per pliras occurrenzas sco per exempel la Higa e la Fiutscher. Durant il temp da corona han ins pudì sa laschar vaccinar là. Quella duai dentant vegnir spazzada. Il parlament ha decis che Cuira na po betg desister dad uschia ina halla e perquai duai vegnir bajegià ina nova. Probabel sin l'areal da l'Obere Au.

Memia paucas infurmaziuns da la suprastanza

Igl ha dentant era dà critica dal parlament envers la suprastanza cun Urs Marti, Sandra Maissen e Patrik Degiacomi. Il messadi ch'els han survegnì dad els avessi stuì cuntegnair dapli infurmaziuns concretas davart il project. Tranter auter davart ils custs, l'intent e la cumparsa da la nova halla. Perquai che quellas infurmaziuns mancavan, n’haja la PPS era betg pudì vuschar per ina nova halla, di il parlamentari Walter Hegner.

Era sche la maioritad da las parlamentarias e dals parlamentaris han vuschà per la nova halla da la citad – tschellas partidas han vuschà – ha la suprastanza stuì empermetter da furnir ulteriuras infurmaziuns en ses proxim messadi. Davart quel po il parlament lura probabel discutar en la sesida dal december.

RTR actualitad 12:00

Artitgels legids il pli savens

Scrollar a sanestra Scrollar a dretga