Il stadion cun il num «Thomas Domenig» giu en l'Obere Au dat bunamain dapart. El è vegnì construì il cumenzament dals onns 80. Tras las entradas da sortida d’urgenza tira il vent, igl è fraid, las tualettas èn decadentas – e sch'i dat blera naiv na pon ins betg giugar perquai ch'il tetg pudess crudar ensemen.
Il stadion tutga a la citad da Cuira. E lezza è conscient da questas sfidas – e tuttina na vegni betg a dar daners per ina construcziun nova. Il president da l'EHC Cuira, Carmine Di Nardo, n'è betg surstà ch'in nov stadion da hockey n'è betg sin la glista da prioritads sco quai ch'el ha ditg envers il schurnal regiunal da SRF.
Nus essan stads involvads en quest process ed avain gì in discurs avert cun la citad da Cuira.
Dal tut tuttina n'è il stadion dentant betg. Perquai sustegna la citad pitschnas adattaziuns per uschia prolungar la vita dal stadion. Plinavant finanziescha la citad in studi ch'examinescha tge ch'in nov stadion u ina sanaziun parziala custass.
Ils investurs sto l'EHC Cuira dentant chattar sez. E quai vegn grev. Carmine Di Nardo quinta ch'in nov stadion custass circa 25 fin 30 milliuns francs. El suppona ch'il stadion actual possia anc vegnir duvrà 7 fin 10 onns. Suenter dovri in nov bajetg.
Sch'il stadion na vegn betg, lura na datti nagin glatsch pli ed uschia nagin EHC Cuira.
E lura mancass a la citad dapli che mo in club da hockey, da quai è il president dal EHC Cuira persvadì. Ch'i pudess vegnir uschè lunsch ch'i na dettia nagin stadion da glatsch pli a Cuira – vi da quel na vul Carmine Di Nardo dentant betg pensar. Era sch'in nov stadion da hockey n'è betg sin la glista da prioritads da la citad, crai el en il futur da l'EHC Cuira. Davostiers marschan e gia discurs cun pussaivels investiders privats.