Il di da futur en il Cussegl grond è stà sut il motto «mattas fan politica». Pudì s'annunziar per il parlament da mattas han las dunnas giuvnas enfin la fin da settember. La finala han alura radund 45 mattas tranter 14 e 16 onns chattà la via a Cuira en l'edifizi dal parlament grischun.
In di pulpì
L'avantmezdi han las giuvnas elavurà e discutà temas en differentas cumissiuns ensemen cun ils profis – deputads e deputadas dal Cussegl grond sco per exempel Anita Mazzetta e Silvio Dietrich. Las quatter tematicas da quest di èn stadas:
- la sanadad psichica da giuvenils
- la plurilinguitad en il Grischun
- la participaziun da giuvenils tar process da decisiun
- il cumportament da consum
Las mattas han alura elavurà tschintg differentas petiziuns tar ils quatter temas.
-
Bild 1 von 6. Las mattas durant la lavur en la cumissiun l'avantmezdi. Bildquelle: Yanick Bürkli.
-
Bild 2 von 6. En las cumissiuns vegn discutà ed elavurà ils temas per la debatta – cun agid da deputads e deputadas. Bildquelle: Yanick Bürkli.
-
Bild 3 von 6. Ina da las giuvnas preschenta ils arguments da sia cumissiun. Bildquelle: Yanick Bürkli.
-
Bild 4 von 6. Las contribuziuns per talian vegnan translatadas, uschia che tuttas sa chapeschan. Bildquelle: Yanick Bürkli.
-
Bild 5 von 6. Ina matta s'engascha per ses interess durant la debatta. Bildquelle: Yanick Bürkli.
-
Bild 6 von 6. Marcus Caduff, il president da la regenza, engrazia a las giuvnas per lur engaschi. Bildquelle: RTR.
Suenter la lavur plitost teoretica da la damaun èsi vegnì serius il suentermezdi. Lura han las dunnas giuvnas debattà davart lur temas – precis uschia sco durant in di da sessiun en il Cussegl grond. Prender il pled, argumentar via ils microfons, declerar e votar per u cunter las petiziuns. La presidenta dal Cussegl grond, Valérie Favre Accola, ha era manà questa debatta – sco tar ils creschids.
Surdada da las petiziuns
Suenter las debattas vivas e las votaziuns finalas han intginas mattas dastgà surdar al president da la regenza, a Marcus Caduff, las petiziuns definitivas.
Jau sun surstà co ch'ellas han argumentà, co ch'ellas han debattà, co ch'ellas èn vegnidas cun lur ideas. Jau na sai betg sche jau fiss stà uschè madir en questa vegliadetgna per sa participar ad ina tala discussiun.
Las petiziuns vegnian uss repartidas sin ils departements responsabels da la regenza e tractadas ed analisadas là, sco Marcus Caduff di. Da tschertinas vegnia simplamain prendì enconuschientscha perquai che la cumpetenza na giaschia betg tar il chantun u l'idea n'è betg realisabla. Autras vegnian sviluppadas vinavant – ma ina resposta dettia en tutta cas per tut las petiziuns.