Per renovar la chamona da Carschina CAS contribuescha il chantun ulteriurs daners. Dals custs dad en tut 2,6 milliuns francs dat el ulteriurs 200'000 francs or da la finanziaziun speziala da sport. Quai ha la regenza annunzià en ina communicaziun a las medias.
Gia il december aveva la regenza annunzià che la renovaziun vegnia sustegnida en il rom da la Nova politica regiunala cun en tut 770'000 francs.
La secziun Rätia dal Club alpin svizzer CAS prevesa da renovar la chamona. Per porscher dapli confort als giasts vegn il dumber da plazs da durmir reducids. La secziun posseda e tgira la chamona da Carschina. La chamona è situada sin 2'236 meters sur mar, en il nord da St. Antönien sut la Sulzfluh sin il territori communal da Luzein en il Partenz.