«Igl è in job da 365 dis» quai di John Alonso, il directur d’eveniments da l'hotel. El ensemen cun duas ulteriuras persunas s'occupan durant tut onn per organisar ils eveniments durant il WEF. «A Tavau hai num suenter il WEF è avant il WEF» di Alonso. Il WEF ha gronda influenza sin l'hotel. Singulas stanzas èn perfin coluradas en las colurs da persunas u firmas che han gì in eveniment en quella. Era sa chatta sin suler ina tavla gravada colurada dad aur cun la suttascripziun e la glista da giasts da l'anteriur president american Bill Clinton che ha fatg in dinner l'onn 2000 en il Grand Hotel.
Passa 160 eveniments durant il WEF
«Nus avain a disposiziun 15 salas, dentant vaglia che mintga chantun en l'hotel po daventar in lieu per in‘eveniment» di John Alonso entant ch'el sa chatta en la sala cun num Atlantis. «Quai è en sasez noss lieu da wellness, nus essans gist sin il pool». Ins ha fatg in palantschieu sur il pool. Be anc ina plachetta cun in scumond da siglir en il pool fa en memoria ch'el stat en sasez sur l'aua. Da conferenzas da pressa enfin tar teaters e party ha tut plaz en las localitads dal Belvédère. En tut èn quai sur 160 eveniments. Mintgamai han ins da fabritgar enturn puspè tut per far plazza per il proxim eveniment. «Organisà vegn da la colur da las tuaglias enfin la grondezza dals plats tut» agiunscha Bassel Fattouh, il collavuratur dad Alonso. El ha ina giada gì in client che ha decidì suenter ch'ins ha sagià ensemen tut las spaisas da midar tut il concept ch'è vegnì planisà sur l'onn – quai trais dis avant l'eveniment. «Nus accumplin quasi mintga giavisch» agiunscha Bassel Fattouh. Nus ans amain, ans odiain, faschain dispita e festivain – nus funcziunain sco team di John Alonso cun in rir.
Evitar excess co «pli baud»
Il Steigenberger Belvédère è enconuschent sco lieu per partys da Google enfin Burda, PWC u auters gronds nums. Dapli in pèr onns saja dumandada dapli discreziun. Pli baud hai dà blers eveniments ch'escalavan, di Alonso che n'era en quels onns dentant betg anc en l'hotel. Adina puspè han las partys procurà per lingias grossas – saja quai cun drogas, alcohol u prostituziun. Oz emprovan ins d’evitar tals excess. Ils clients vulan perfin ch'il persunal restrenscha l'alcohol per ils giasts. «Concret datti per exempel contracts cun firmas che dian ch'ins na po betg dar dapli che dus magiels vin als giasts. Da tegnair en quai essan nus lura responsabels.» I na saja betg il problem da custs, mabain propi ch'ins vul evitar ch'i dat escalaziuns. Exclusivitad e discreziun è dumandada.
E sin la dumonda sch'el visita lura tut las partys, numnadamain passa 160, di John Alonso cun in surrir: «Quai è mes job».
